काठमाडौं । शहीद गंगालाल राष्ट्रिय हृदय केन्द्रमा पहिलो पटक ‘अलकापा’ शल्यक्रिया सफल भएको छ । केन्द्रमा उपचार गर्न आएका ९ महिने बालकको बरिष्ठ मुटु शल्यचिकित्सक डा.रविन्द्र भक्त तिमलाको मेडिकल टिमले उक्त सफल शल्यक्रिया गर्नुभएको हो ।
मुटुमा रक्त सञ्चार गर्ने मूलनसा लेफ्ट कोरोनरी आर्टरी एओर्टाबाट निस्कनु पर्नेमा पल्मोनरी आर्टरीबाट निस्केको अवस्थालाई अलकापा भनिन्छ । सो नशालाई फेरी मुटुको मुलधमनी एओर्टामा नै लगेर जोडिने शल्यक्रिया नै ‘अलकापा’ शल्यक्रिया हो । बरिष्ठ मुटु शल्य चिकित्सक डा.रविन्द्र भक्त तिमलाका अनुसार विरलै हुने यसखाले रोग,तीनलाख जीवित जन्मेका शिशुमध्ये एकजनामा देखापर्ने गर्दछ ।
शहीद गंगालाल राष्ट्रिय हृदय केन्द्रमा हालै ९ महिने बालकको उक्त सफल शल्यक्रिया गरीएको हो । पल्मोनरी आर्टरीबाट निस्केको रगतको नलीमा प्रेसर र रगतको संचार कमहुने हुनाले मुटुको मांशपेशीलाई आवश्यक रगत नपुगी मांशपेशीको खुम्चिने शक्ति कमहुन जान्छ । यो समस्या लिएर आएको बालकको मुटुको खुम्चिने शक्ति घटेर १०–१५प्रतिशतमा पुगेको थियो । उपचारपछि उक्त बालकको मुटुको खुम्चिने शक्तिमा सुधारभई बढेर ३५प्रतिशतमा पुगेको उपचारमा संलग्न डा.तिमलाले जानकारी दिनुभयो ।
साधारणतया मुटुको खुम्चिने शक्ति ६० प्रतिशत हाराहारीमा हुने मुटुरोग विशेषज्ञहरुको भनाइ छ ।
