झापा । यहाँका नगर अस्पतालमा उपचारका लागि आउने बिरामीको चाप बढेको छ । स्वास्थ्य बीमाको प्रथम बिन्दुको रूपमा सेवा दिँदै आएका नगर अस्पतालले पछिल्लो समय सेवाको गुणस्तरसमेत बढाएका छन् ।
विर्तामोड, मेचीनगर, अर्जुनधारा, कनकाईलगायतका नगरपालिकाले आफ्नै नगर अस्पताल सञ्चालन गरिरहेका छन् । झापाका गाउँपालिकामा आधारभूत अस्पताल छन् ।
धुलाबारी स्वास्थ्य केन्द्रलाई स्तरोन्नति गर्दै सञ्चालनमा आएको मेचीनगर नगर अस्पतालमा सात महिना यता ६२ हजार ८७७ जनाले उपचार सेवा लिएको नगरकी स्वास्थ्य शाखा प्रमुख सविता सापकोटाले बताउनुभयो ।
“ विशेषज्ञ उपचार सेवा प्रदान गर्न थालेपछि उपचारका लागि आउने नगरबासीको सङ्ख्या बढेको छ,” उहाँले भन्नुभयो, “हरेक नागरिकको स्वास्थ्य सुविधामा पहुँच पुग्नुपर्छ भनेर हामीले सेवालाई विस्तार गरिरहेका छौँ । त्यहीअनुसार नगरबासीेले विश्वास गर्न थाल्नुभएको छ ।”
मेचीनगर–१० धुलाबारीमा रहेको मेचीनगर अस्पतालमा स्त्रीरोग तथा प्रसुति, बालरोग तथा नाक, कान र घाँटी, जनरल फिजिसियनलगायतको उपचार सेवा उपलब्ध रहेको उहाँले जानकारी दिनुभयो । सरकारी अस्पताल जाने अधिकांश नगरबासी स्वास्थ्य बीमामार्फत उपचार लिने गर्छन् ।
बिरामीको चाप बढेकाले वैशाखदेखि १५ शय्या राखेर २४ घण्टा सबै सेवा उपलब्ध हुनेगरी नवनिर्मित भवनबाट उपचार सेवा सञ्चालन गरिने नगरपालिकाका प्रमुख प्रशासकीय अधिकृत अग्निप्रसाद अधिकारीले बताउनुभयो । अस्पतालमा बीमामार्फत सबै किसिमका औषधि पाइने भएकाले सर्वसाधारणमा नगरको अस्पतालप्रति विश्वास बढेको उहाँको भनाइ छ ।
अस्पतालले ओपीडी, इसीजी, युएसजी, बीमा, फार्मेसी, ल्याबलगायतका सेवा दिँदै आएको छ । भदौ ४ गते सुरु भएको नगर अस्पतालबाट फागुन मसान्तसम्ममा १९ हजार ५०५ जनाले ल्याव सेवा, दुई हजार २३४ जनाले युएसजी, ८४८ जनाले ईसीजी र २७५ जना बिरामीले इमरजेन्सी सेवा लिएको पाइएको छ ।
नगरपालिकाले चार जना एमबीबीएस डाक्टरबाट उपचार सेवा प्रदान गर्दै आएको जनाउँदै प्रमुख प्रशासकीय अधिकृत अधिकारीले चैतदेखि थप अल्ट्रासाउन्ड सेवा दिन थालेको बताउनुभयो ।
यसैगरी, विर्तामोड नगर अस्पतालले दैनिक चार सयसम्म बिरामीलाई विभिन्न उपचार सेवा उपलब्ध गराउँदै आएको छ । ठूलाठूला निजी अस्पतालले भरिएको विर्तामोडमा विश्वसनीय उपचार सेवाकै कारण सरकारी अस्पतालमा सेवा लिन आउने बढिरहेको अस्पतालका मेडिकल सुपरिन्टेन्डेन्ट डा सुनिल अधिकारीले बताउनुभयो ।
उहाँले अस्पतालमा इमर्जेन्सी र प्रसुति सेवासमेत रहेको छ । अस्पतालमा इमर्जेन्सी सेवा लिँदा स्वास्थ्य विमा बाहेकका सेवाग्राहीले रु १०० को टिकट काट्नु पर्ने व्यवस्था छ ।
अस्पतालमा २४ घण्टा नर्मल डेलिभरी सेवा उपलब्ध रहेको जनाउँदै मेसु डा अधिकारीले स्त्री तथा प्रसुति रोग विशेषज्ञ, नवजात शिशु तथा बालरोग विशेषज्ञ, मनोरोग विशेषज्ञ, हाडजोर्नी तथा नसा रोग विशेषज्ञ र फिजिसियन डाक्टरको ओपीडी सेवा दैनिक उपलव्ध रहेको बताउनुभयो । स्वास्थ्य विमा सेवा, भिडियो एक्स रे, नर्मल एक्स रेलगायत सर्जरी र आधुनिक ल्याबसमेतको सेवा रहेको उहाँले जानकारी दिनुभयो ।
विर्तामोडको १५ शय्याको नगर अस्पताललाई स्तरोन्नति गर्दै नयाँ भवनमा सञ्चालन गर्ने तयारी भइरहेको छ । निर्माणको अन्तिम चरणमा पुगिसकेको नयाँ भवन रु १५ करोड ३४ हजार ३३६ मा निर्माण भइरहेको छ । नयाँ भवनमा २५ शय्या सञ्चालन गरिने नगरप्रमुख पवित्रा महतरा प्रसाईले बताउनुभयो ।
“आर्थिक अभाव भएका नागरिकले निजी अस्पतालमा उपचार गराउन सक्दैनन्,” नगरप्रमुख प्रसाई भन्नुहुन्छ, “हामीले विपन्न र असहायलाई उपचारबाट कहिल्यै बञ्चित गरेका छैनौँ । विशेषज्ञ र गुणस्तरीय सेवा पाएपछि नगरबासी नगर अस्प्तालमै उपचारका लागि आउन थाल्नुभएको छ ।”
कनकाई र अर्जुनधारामा पनि नगर अस्पताल सञ्चालनमा रहेका छन् । स्वास्थ्य बीमाको प्रथम विन्दु तोकिएका कारण नागरिक सरकारी नगर अस्पतालको उपचार सेवाप्रति आकर्षित भएका छन् । रासस
