भरतपुर अस्पतालमा क्याथल्याव सेवा शुरु

चितवन । मेडिकल सिटीको रुपमा विकशित भरतपुरस्थित संघीय अस्पताल भरतपुर अस्पतालले क्याथल्याब लगाएतका थप नयाँ सेवाहरु विस्तार गरेको छ । अस्पतालमा सोमवार आयोजित एक कार्यक्रमका विच स्वास्थ्य तथा जनसख्या मन्त्री प्रदिप पौडेलले उद्घाटन गर्नुभए सगैँ अस्पतालले क्याथल्याब लगाएतका नयाँ नौवटा सेवा विस्तार गरेको अस्पतालका मे.सु.प्रा.डा.कृष्ण प्रसाद पौडेलले जानकारी दिनुभयो ।

अस्पतालले मुटु तथा शरिरका अन्य स्थानमा रक्तनलीहरु बन्द हुने समस्यामा दुरपिनको माध्यमवाट शल्यकृया गराउनेगरी क्याथल्याब सेवा शुरु गरेको हो,भने यो सगैँ आईसियू सहितको जलन वार्ड,फर्टिलिटी क्लिनिक, स्तनपान प्रर्वधन कार्यक्रम,चाइल्ड प्ले थेरापी, योगा ध्यान केन्द्र लगाएतका सेवाहरु सञ्चालनमा ल्याएको छ ।

सेवा शुभारम्भ गराउँदै मन्त्री पौडेलले भरतपुर अस्पताललाई सवै खालको उपचार उपलब्ध गराउन सक्ने क्षमताको अस्पतालका रुपमा विकशित गराउन सरकार लागेको बताउनुभएको छ । “यो अस्पताललाई सवै खालको उपचार सेवा हुने विशिष्टकृत अस्पताल वनाउन मन्त्रालय, विकास समिति र अस्पताल प्रशासन निरन्तर लागि रहेको छ”, उहाँले भन्नुभयो ।

मन्त्री पौडेलले भरतपुर अस्पतालको सेवा विस्तार संगसंगै एमबिबिएस कक्षा यसै वर्षदेखि सञ्चालन गर्ने तयारी भैरहेको पनि बताउनु छ ।
“एमबिबिएस कार्यक्रम एकेडेमिक कार्यक्रम हो । स्वास्थ्य मन्त्रालय संग मात्रै हैन चिकित्सा शिक्षा आयोग संग सम्वन्धित कार्यक्रम हो । अघिल्लो वर्ष आयोगले नै स्विकृत नदिँदा यो अस्पतालले एमबिबिएस पढाउन पाएन । यो वर्ष हामीले अहिले नै आयोगलाई पत्र लेखेर अनुमति मागी सकेका छौँ”, उहाँले स्पष्ट शब्दमा भन्नुभयो ।

विगतमा प्रतिष्ठान नहँुदा भरतपुरले एमबिबिएस कार्यक्रम नपाएको पनि उहाँले खुलाउनु भयो । तर यो वर्षदेखि प्रतिष्ठान नभएपनि मन्त्रालयकै पहलमा भरतपुरमा एमबिबिएस सञ्चालन हुने उहाँले विश्वास दिलाउनु भएको हो । यो अस्पतालमा सेवा लिनका लागि देशका विभिन्न क्षेत्रबाट विरामीहरु आउने गर्दछन् ।