चितवन । पुरूषमा हुने प्रोस्टेट क्यान्सर र मानसिक स्वास्थ्यसम्बन्धी सचेतनाका लागि चितवनमा मोटरसाइकल र्याली सम्पन्न भएको छ ।
रोयल राइनो राइडर्स मोटरसाइकल क्लब चितवनद्वारा आयोजना गरिएको सचेतनामूलक मोटरसाइकल र्याली ‘डिस्टिङ्गुइस्ड जेन्टलमेन्स राइड २०२५’ एक अन्तर्राष्ट्रिय कार्यक्रम हो जुन संसारका विभिन्न प्रमुख शहरहरुमा प्रत्येक वर्ष हुने गर्दछ भने नेपालमा पनि यस वर्ष चितवन, काठमाडौं, धरान र हेटौंडामा स्थानीय मोटरसाइकल क्लबहरुको सहभागितामा भव्य रूपमा आयोजना गरिएको हो ।
र्यालीमा १३२ वटा क्लासिक भिन्टेज मोटरसाइकलहरु सहित औपचारिक ड्यापर ड्रेसमा विभिन्न उमेर समुहका १६० राइडर्स जसमा धेरै पुरुष सहभागी थिए , भने महिला र बालबालिकाको पनि सहभागीता रहेको रोयल राइनो राइडर्स मोटरसाइकल क्लब चितवनका अध्यक्ष प्रितम श्रेष्ठले जानकारी दिनुभयो ।
संस्थाले चितवनमा विगत ७ वर्षदेखि यसखाले सचेतनामूलक कार्यक्रम गर्दै आएको छ । कार्यक्रममा श्री पाँच,डाहा भिन्टेज,डिसेप्टिकन्स,खल खास,लोको सवारी,माइलस्टोन,कावासोती एनफिल्डर्स लगायत चितवन तथा नवलपुरका विभिन्न मोटरसाइकल क्लबहरूका राइडर्सहरु पनि सहभागी भएका थिए ।
कार्यक्रमका सहजकर्ता रोयल राइनो राइडर्स मोटरसाइकल क्लब चितवनका सदस्य र समिट हेल्थकेयर अस्पताल प्रा.लि.,भरतपुरका कन्सल्टेन्ट फिजिसियन डा.शशांक कुमार सिंहले पुरुषको मानसिक स्वास्थ्य र प्रोस्टेट क्यान्सर सम्बन्धी सचेतना वृद्धिका लागि सामूहिक प्रयास आवश्यक रहेको बताउनु भएको थियो।
