विश्व थाइराईड दिवस :- थाईराइडले जटिल रोगलाई थप जटिल पार्दछ : चिकित्सक

चितवन । कुनैपनि जटिल रोगको मुख्य कारक र रोगलाई थप गम्भिर असर गर्ने थाईराईड भएको चिकित्सकहरुले बताएका छन । विश्व थाईराइड दिवसको अवसरमा आज पुष्पाञ्जली अस्पताल भरतपुरले आयोजना गरेको थाईराइड सचेतना तथा प्रशिक्षण कार्यक्रममा विभिन्न विधाका चिकित्सकहरुले थाईराइडले अन्य जटिल रोगलाई गम्भिर असर पार्ने बताएका हुन् ।

कार्यक्रममा पुष्पाञ्जली अस्पतालका वरिष्ठ फिजिसियन डा. भोजराज अधिकारी, न्युरो सर्जन कुमार पौडेल, स्त्री तथा प्रसुति रोग विशेषज्ञ डा.रामप्रसाद सापकोटा, बाल रोग विशेषज्ञ डा.किरण देवकोटा तथा भरतपुर अस्पतालका वरिष्ठ मनोरोग बिशेषज्ञ डा.सुनील शाहले थाईराइडको रोगको कारण, असर र निदानका बारे अभिमुखीकरण गर्नुभएको थियो ।

सो अवसरमा बोल्दै डा. अधिकारीले पछिल्लो समय मधुमेह भन्दा थाईराइड रोग जटिल बन्दै गएको बताउनु भयो । ‘थाईराईड आफैंमा रोग होइन, तर यसले अन्य जटिल रोग भएकालाई गम्भिर असर पार्दछ । उहांँले भन्नुभयो ।
पछिल्लो समय हरेक घरमा थाईराइडको समस्या रहेको भन्दै उनले ५० प्रतिशत मानिसहरु थाईराइड स्वास्थ्य परीक्षणको पहुंँच बाहिर रहेको बताउनु भयो । ’चाहे मुटुरोगी होस, या मृगौला वा अन्य जटिल रोग थाईराइड हर्मोन घटबढ भएमा यसले त्यस्ता रोगलाई थप जटिल पार्दछ ।’ डा. अधिकारीले भन्नुभयो ।
न्यरो सर्जन डा. पौडेलले थाइराइड र न्यूरोको सम्बन्ध नजिक रहेको बताउनु भयो । हामीले न्युरो सम्बन्धीका बिरामीको उपचार गर्दा सबैभन्दा पहिले थाइराइडनै चेक गर्छौ, डा. पौडेलले भन्नुभयो, यसको सम्बन्ध सिधा टाउको देखि तल हातखुट्टा सम्म हुने गर्दछ ।

मनोरोग विशेषज्ञ डा. शाहले मानसिक रोग हुने अधिकांश बिरामीमा थाईराईड हुने गरेको बताउनु भयो । ‘अस्पतालमा बिरामीहरु तनाव भयो, खान मन लागेन, निन्द्रा लागेन छटपटी भयो भनेर आउनु हुन्छ तर परीक्षण गर्दा अधिकांशमा थाईराइड देखिएको पाएका छौं । डा. शाहले भन्नुभयो । मानसिक रोग र थाईराइडको लक्षण मिल्दोजुल्दो हुने गरेको उहांँको भनाई छ ।
स्त्री तथा प्रसुति रोग विशेषज्ञ डा. सापकोटाले बिशेषगरी गर्भवती महिलामा थाईराइड हुने गरेको बताउनु भयो । ‘गर्भवती भएका महिलाहरुको परीक्षण गर्दा पछिल्लो समय अधिकांशमा थाईराइड देखिने गर्दछ, उहांँले भन्नुभयो, थाईराइड हर्मोन घटबढ हुंँदा बच्चा खेर जाने र जन्मिएको बच्चामा बृद्धि बिकास समेत कम हुने गर्दछ ।

यसका लागि शुरुमै थाईराइड परीक्षण गरेर औषधि नियमित गरेमा गर्भवती तथा सुत्केरी महिलालाई थप असर नपुग्ने उहांँको भनाई छ । ’अहिले पुरुषमा भन्दा ८ गुणा बढी थाईराइड बढी महिलाहरुमा हुन्छ , उहांँले भन्नुभयो , कारण महिलाको शारिरीक बनोट र अंगको काम गर्ने प्रवृत्तिनै फरक हुन्छ ।’
बालरोग विशेषज्ञ डा. देवकोटाले बालकहरुमा पनि थाईराइडको समस्या हुने गरेको बताउनु भयो । ‘अभिभावकहरु बच्चा सुस्त भयो, बृद्धि बिकास कम भयो तथा अन्य असाधारण लक्षण देखा पर्यो भनेर आउनुहुन्छ उहांँले भन्नुभयो, तर चेकगर्दा बच्चामा थाइराइड हर्मोनको घटबढ भएको पाउंँछौं । ’गर्भवती एवं सुत्केरी भएका महिलाहरुमा थाइराइड हुंँदा त्यो समस्या बच्चाहरुमा पनि सर्ने गरेको पनि छ ।‘
कार्यक्रममा शिक्षक प्रेम रिमाल, सर्प उद्धारक यमलाल भण्डारी, धर्मराज कंडेल लगायतले थाईराइडको समस्या तथा अनुभवका बारे धारणा राख्नु भएको थियो । अस्पतालका अध्यक्ष चेतनाथ वाग्लेको अध्यक्षतामा सम्पन्न कार्यक्रममा प्रबन्ध निर्देशक सुजन अधिकारीले स्वागत मन्तव्य राख्नु भएको थियो ।