बागमती श्रेष्ठ
बुलिङटार । नवलपुरको पहाडी भेग बुलिङटारमा बसोबास गर्ने नागरिकलाई स्वास्थ्य सेवा तथा सचेतना अभिवृद्धि गर्ने उद्देश्यले एकदिने विशिष्टकृत निःशुल्क स्वास्थ्य शिविर सम्पन्न भएको छ। बुलिङटार गाउँपालिका र भरतपुरस्थित कोशिश अस्पताल प्रा लि को संयुक्त आयोजनामा शिविर सञ्चालन गरिएको हो।
आयोजित शिविरमा वरिष्ठ मृर्गौला रोग विशेषज्ञ डा.सन्तोष गुरुङ,वरिष्ठ स्त्री तथा क्यान्सर रोग विशेषज्ञ डा.सरिता राना गुरुङ, वरिष्ठ हाजोर्नी तथा नशा रोग विशेषज्ञ डा.दीपक बन्जाडे, वरिष्ठ जनरल फिजिसियन डा.सनोज श्रेष्ठ, बालरोग विशेषज्ञ डा.सिखा पाण्डे, डा.अमिषा अधिकारी लगायत करिब दुईदर्जन स्वास्थ्यकर्मीहरुले १७० जना बिरामीको सचेतनासंगै स्वास्थ्य परीक्षण गर्नुभएको थियो।
शिविरमा सेवाग्राहीको स्वास्थ्य परीक्षण गर्दा उच्च रक्तचाप , कोलेस्टेरोल, मधुमेह, महिलाहरुको पाठेघरको मुखमा मासु पलाएको , पिसाबथैली आफ्नो ठाउँ भन्दा तल खसेको, सेतोपानी बग्ने समस्या देखा परेको डा. सरिता राना गुरुङले बताउनुभयो। त्यसैगरी हाडजोर्नीका बिरामीहरुमा हात बाङ्गिएको, हड्डी खिइएको समस्या भयका बिरामी देखिएको डा.बन्जाडेले जानकारी दिनु भयो। शिविरमा बिरामीहरुलाई आवश्यक अनुसार औषधि र रगत परीक्षण गरिएको थियो।
कार्यक्रममा पालिकाका अध्यक्ष दीपेन्द्र सुनारीले मेडिकल टिमलाई विशेष धन्यवाद ज्ञापन गर्दै बुलिङटारका नागरिकको स्वास्थ्यप्रति बुलिङटार गाउँपालिका गम्भीर रहेको बताउँदै अब बीमा कार्यक्रम मार्फत आम नागरिकको सेवालाई सहज र प्रभावकारी कार्यान्वयन हुनेगरी अगाडी बढाउने प्रतिबद्धता व्यक्त गर्नुभयो। त्यस्तैगरी मेडिकल टिमको तर्फबाट मन्तब्य राख्नुहुँदै वरिष्ठ मृगौला रोग विशेषज्ञ डा. सन्तोष गुरुङले बुलिङटार गाउँपालिका क्षेत्रमा आउनका लागि यातायातको सुविधा निकै सहज भएकाले कोशिश अस्पताल प्रा लि भरतपुरमा गर्नुपर्ने सेवा र बार्षिक रुपमा पालिका तहमै आयर गर्नुपर्ने स्वास्थ्य सेवामा अस्पताल परिवार सधैँ तयार रहेको बताउनुभयो।
शिविर कार्यक्रमको स्थानीय संयोजन गंगा फाउन्डेसन,बुलिङटार र बुलिङटार जेसीजले गरेको थियो। भने औषधि सौजन्य ओम मेगाश्री फर्मास्युटिकल्स लिमिटेड, काठमाडौंसहितका कम्पनीहरुले गरेका थिए।
