चितवन । हाड तथा जोर्नी सर्जन बिशेषज्ञहरुको भरतपुरमा तेस्रो एसटाबुलर काडाभेरिक कार्याशाला सम्पन्न भएको छ ।
आइतबार भरतपुर अस्पतालमा एशोसियसन अफ पेल्भी एसटाबुलर सर्जन अफ नेपाल ( एपासन) को आयोजनामा एक दिने उक्त कार्याशाला सम्पन्न भएको हो । कार्याशालामा देशभरका हाड तथा जोर्नी विधाका ४० शल्य चिकित्सक तथा बिषेशज्ञहरुको सहभागिता थियो ।
बिशेषगरी कम्मर मुनिको भागको हाड तथा जोर्नीको शल्यक्रिया तथा उपचारको बारेमा वरिष्ठ शल्य चिकित्सकद्धारा कनिष्ठ चिकित्सकहरुलाई प्रशिक्षण दिईएको एपासनका केन्द्रिय अध्यक्ष प्रोफेसर डाक्टर सुरेश पाण्डेले जानकारी दिनुभयो ।
उहांँका अनुसार विभिन्न अनुभवी विशेषज्ञहरूले पेल्भी–एसेटाबुलर सर्जरी कठिन शल्यक्रिया भएकोले यो उपचारका लागि अपनाइने दृष्टिकोण, शल्यप्रविधि तथा प्रयोग गरिने इम्प्लान्ट र उपकरणहरूको सैद्धान्तिक प्रशिक्षण दिईएको थियो । यससम्बन्धी सेवाको पहुंँच देशभरी पुर्याउने उद्धेश्यसहित कार्याशाला आयोजना गरिएको उहांँको भनाई छ ।
प्राडा पाण्डे वरिष्ठ हाडजोर्नी बिशेषज्ञको रुपमा झण्डै तीन दशकदेखि काम गर्दै आउनु भएको छ भने हाल पुरानो मेडिकल कलेज भरतपुरमा कार्यरत हुनुहुन्छ ।
कार्यशालामा ८ जना बिषय विज्ञ (काठमाडौँ, भरतपुर तथा नेपालका विभिन्न स्थानहरूबाट) को नेतृत्वमा ३२ जना सहभागीहरूलाई तीन समूहमा विभाजन गरिएको थियो।
दुई समूहलाई क्याडेभर (शव नमूना) प्रयोग गरेर प्रत्यक्ष अभ्यास गराइएको थियो भने एक समूहलाई इन्स्ट्रुमेन्ट प्रशिक्षण दिइएको र सवैलाइ यस बिषयमा अभ्यस्त गराइएको थियो ।
कार्यशालाका सहभागीहरूले पेल्भी एष्टाबुलर सर्जरीमा अपनाइने विविध पद्धति, हड्डीको एक्सपोजर, इम्प्लान्ट प्रयोग र शल्यक्रियाको संवेदनशील बिषयमा अभ्यास गर्ने अवसर पाएका थिए ।
कार्यशालामा एपासनका पूर्व अध्यक्ष प्राडा दिपक श्रेष्ठ, प्राडा राजेन्द्र अर्याल , डा. जगदीश थापा , डा. मनोज कंडेल लगायतको सहभागिता थियो ।
