चीनमा अपाङ्गता भएका व्यक्तिहरूको रोजगारी दरमा उल्लेखनीय वृद्धि

बेइजिङ ।चीनले अपाङ्गता भएका व्यक्तिका लागि रोजगारीका अवसर विस्तार गर्न उल्लेखनीय प्रगति हासिल गरेको छ । बुधबार सार्वजनिक गरिएको आधिकारिक तथ्यांकअनुसार, पछिल्ला तीन वर्षमा अपाङ्गता भएका व्यक्तिहरूको राष्ट्रिय रोजगारी दरमा ४.८ प्रतिशत बिन्दुको वृद्धि भएको छ ।

यो उपलब्धि सन् २०२२ देखि २०२४ सम्मको पहिलो तीन वर्षे कार्ययोजना अन्तर्गत सम्भव भएको हो, जसले शहरी तथा गाउँले क्षेत्रमा करिब १६ लाख ५० हजार नयाँ रोजगारी सिर्जना गर्न सहयोग गरेको चीन अपाङ्गता संघकी उपाध्यक्ष ली डोङमेइले पत्रकार सम्मेलनमा जानकारी दिनुभयो ।

उक्त अवधिमा झन्डै १४ लाख ३० हजार अपाङ्गता भएका व्यक्तिहरूले प्रमाणित व्यवसायिक तालिम प्राप्त गरेका छन्, जसले उनीहरूको सीपस्तर र काम गर्ने तयारीमा उल्लेखनीय सुधार ल्याएको छ ।
उच्च शिक्षा क्षेत्रमा पनि निरन्तर प्रगति देखिएको छ । पाँच वर्षदेखि, स्नातक तहका सम्पूर्ण अपाङ्गता भएका व्यक्तिहरूलाई रोजगारी सहायता सूचीमा समावेश गरिएको छ । काम खोज्ने मध्ये ८५ प्रतिशतभन्दा बढीले सफलतापूर्वक रोजगारी पाएका छन् ।

यस उपलब्धिलाई थप अघि बढाउन चीनको राज्य परिषद्को सामान्य कार्यालयले नयाँ तीन वर्षे कार्ययोजना (सन् २०२५–२०२७) जारी गरेको छ, जुन अपाङ्गता संघ र ३० सरकारी निकायहरूको सहकार्यमा तयार गरिएको हो । यस योजनामा रोजगारी सुधारका लागि १० विशेष कार्यहरू समावेश गरिएको छ ।

अपाङ्गता संघ अन्तर्गत शिक्षा र रोजगारी विभागका निर्देशक रेन झानबिनका अनुसार, नयाँ चरणले अझै विशेष र आवश्यकता अनुसारको योजना लागू गर्नेछ । “हामी रोजगारीका अवसर मात्र बढाउने होइन, ती अवसर अपाङ्गता भएका व्यक्तिको सीप र आवश्यकतासँग मेल खाने, दीर्घकालीन स्थायित्व दिने बनाउने लक्ष्यमा छौं,” उहाँले भन्नुभयो ।

यस योजनाअन्तर्गत सम्बन्धित सरकारी निकाय र स्थानीय प्रशासनले सेवा सुधार गर्ने, रोजगारी सहायता बलियो बनाउने र देशभरका करिब आठ करोड ५० लाख अपाङ्गता भएका व्यक्तिलाई अझ राम्रो र गुणस्तरीय रोजगारीमा पहुँच पु¥याउने कार्यलाई तीव्रता दिनेछन् । रासस