काठमाडौँ । नेपाली सेनाले जनैपूर्णिमालाई लक्षित गरी आयोजना गरेको स्वास्थ्य सहायता शिविरबाट ६ हजार २३३ तीर्थयात्री लाभान्वित भएका छन् ।
बाजुरास्थित ईश्वरीबक्स गुल्मबाट बडीमालिका मन्दिर जाने तीर्थ यात्रुलाई लक्षित गरी परिचालित चिकित्सकसहितको स्वास्थ्य टोलीले ८५८ जनाको स्वास्थ्य परीक्षण गरी औषधि उपलब्ध गराएको सैनिक जनसम्पर्क तथा सूचना निर्देशनालयले जनाएको छ।
बागलुङ ढोरपाटनस्थित दुर्गा भञ्जन गुल्मबाट ढोरबराह क्षेत्रमा ४१७ जना तथा ओखलढुङ्गास्थित दुर्गाबक्स गणबाट सोलु दूधकुण्डमा ३५६ तीर्थयात्रीलाई स्वास्थ्य सेवा उपलब्ध गराइएको पनि सेनाले जानकारी दिएको छ।
यस्तै लमजुङस्थित चण्डीप्रसाद गणबाट दूधपोखरीमा १३० तथा रसुवास्थित श्रीनाथ गणबाट गोसाइँकुण्ड जाने विभिन्न आठ स्थानमा खटिएको विशेषज्ञ चिकित्सकसहितको टोलीले चार हजार १९० जनालाई स्वास्थ्य सहायता उपलब्ध गराएको छ। भक्तपुर जिल्लास्थित रणशेर गणबाट डोलेश्वर महादेव मन्दिरमा २८२ जनाको प्राथमिक उपचार एवं सामान्य स्वास्थ्य परीक्षण गरिएको पनि निर्देशनालयले जनाएको छ।
तीर्थयात्राका क्रममा जटिल स्वास्थ्य समस्या भएका तीर्थालुमध्ये दूधकुण्डबाट चार,गोसाइँकुण्डबाट ६ तथा बडीमालिकाबाट सात जनालाई स्ट्रेचरमार्फत उद्धार गरिएको थियो। त्यसमा अक्सिजनको कमी भई गम्भीर बिरामी भएका पाँच जनालाई सात सिलिन्डर अक्सिजन प्रदान गरिएको सेनाले जनाएको छ। बडिमालिकाबाट त्रिवेणी पाटन जाने क्रममा यही साउन २२ र २३ गते विष्णुपानीको भिरबाट लडेका ५२ वर्ष र ७५ वर्षका पुरुषको शव निकाली परिवारलाई हस्तान्तरण गर्ने क्रममा सेनाको हेलिकप्टरमार्फत सुर्खेत पु¥याइएको निर्देशनालयले जनाएको छ।
