मोरङ । विराटनगरस्थित न्यूरो,कार्डियो एण्ड मल्टिस्पेसियालिटी हस्पिटल प्रा.लि.ले आफ्नो रजत जयन्तीको अवसरमा सप्ताव्यापी कार्यक्रम सञ्चालन गरी रहेको छ।
अस्पतालको सप्ताहव्यापी कार्यक्रम अन्तर्गत बुधबार झिःपुचको भवनमा २५० पिन्ट रगत संकलन गरिएको हो।
रक्तदान कार्यक्रममा अस्पतालमा कार्यरत कर्मचारी,स्वास्थ्यकर्मी र सर्वसाधारणले रक्तदान गर्नु भएको थियो। सो कार्यक्रमलाई सम्बोधन गर्दै हस्पिटलका संस्थापक एवं वरिष्ठ,न्यूरोलोजिस्ट डा.वीरेन्द्रकुमार विष्टले रगतको अभावमा कसैले पनि अकालमा ज्यान गुमाउन नपरोस् भन्ने पवित्र उद्देश्यले कार्यक्रम आयोजना गरिएको बताउनु भयो।
त्यस्तैगरी कार्यक्रममा हस्पिटलका प्याथोलोजिस्ट डा.सागरराज पाण्डेले रक्तदानको प्राविधिक तथा स्वास्थ्य महत्वबारे सहजीकरण गर्नु भएको थियो। डा.पाण्डेका अनुसार शरीरमा रगतको मात्रा सन्तुलित हुनुपर्ने साथै नियमित रक्तदानले रक्तदाताको स्वास्थ्यमा सकारात्मक प्रभाव पार्ने जानकारी दिनुभयो।
न्यूरो एण्ड कार्डियो अस्पताल २५औं वर्षमा प्रवेश गरेको छ। यस अस्पतालले पूर्वी नेपालमा रहेका विभिन्न सामाजिक संघ,संस्थासंग सहकार्य गरी आफ्नो सामाजिक उत्तरदायित्व बहन गर्दै आएको छ।
