छत चुहिएको जीर्ण भवनमा आयुर्वेद औषधालय

झापा । शिवसताक्षी–११ स्थित दुधे आयुर्वेद औषधालयका कर्मचारीले जोखिम मोलेर पानी चुहिने छत भएको २९ वर्ष पुरानो जीर्ण भवनबाट सेवा प्रदान गरिरहेका छन् ।

दुई तला रहेको उक्त भवनमा आठवटा कोठा छन् । भूकम्पीय जोखिमयुक्त तिनै कोठामा बसेर छ जना कर्मचारीले दिनभर सयौँ सेवाग्राहीलाई उपचार तथा परामर्श सेवा दिइरहेका हुन्छन् ।

“भवन जीर्ण भइसकेको छ, कुन बेला कस्तो जोखिम निम्तिने हो केही टुङ्गो छैन”, औषधालयका प्रमुख कविराज निरीक्षक राजेन्द्र पोखरेल भन्नुहुन्छ, “दुईतले यो भवन धेरै पुरानो भइसकेको छ । सबैभन्दा जोखिमको विषय भनेको भवनमा जाली कसेर बनाइएको पिलर नै छैन ।”

भवन जोखिमयुक्त भए तापनि औषधालयमा सेवाग्राहीको भने घुइँचो लाग्ने गरेको छ । आर्थिक वर्ष २०८१÷८२ मा औषधालयबाट तीन हजार ९३२ जना बहिरङ्ग विभाग (ओपिडी)का सहित आठ हजार १३२ जनाले उपचार सेवा लिएको पोखरेलले बताउनुभयो ।

उक्त अवधिमा पञ्चकर्म र पूर्वकर्म सेवा लिन एक हजार ८४५ जना, गाउँघर क्लिनिकमा सेवा लिन तीन सय ६९ जना र स्तनपायी आमा सेवा लिन तीन सय २० जना सेवाग्राही आएको तथ्याङ्कले देखाउँछ ।

औषधालयले बहिरङ्ग सेवा, औषधि वितरण, परामर्श सेवा, पञ्चकर्म सेवा, पूर्वकर्म सेवा, ज्येष्ठ नागरिक प्रवर्द्धन सेवा, स्तनपायी आमालाई मातृशिशु सुरक्षार्थ दुग्धवद्र्धक जडीबुटी वितरण सेवा, थेराप्युटिक सेवा, प्याथोलोजी सेवा, मर्म थेरापी सेवा र स्वस्थ जीवन परामर्श सेवा दिँदै आएको छ ।

नगरको एकमात्र आयुर्वेद औषधालय भएकाले यसको स्तरोन्नति र सञ्चालनमा स्थानीय तहको भूमिका आवश्यक हुन्छ । औषधालयलाई नगरस्तरीय आयुर्वेद अस्पतालका रूपमा स्तरोन्नति गर्न आवश्यक बजेट माग गरिएको र नयाँ भवनका लागि जग्गाको खोजी भइरहेको औषधालय प्रमुख पोखरेल बताउनुहुन्छ ।

“गत वर्ष छत टालटुल मर्मत गरेका छौँ, आधुनिक सुविधासम्पन्न नयाँ भवनको खाँचो छ”, उहाँले भन्नुभयो, “यसका लागि स्थानीय र प्रदेश सरकारलाई निरन्तर आग्रह गरिरहेका छौँ ।” जग्गा प्राप्तिका लागि सार्वजनिक सूचना जारी गरिएको र दुवै तहको सरकारसँग समन्वय भइरहेको उहाँको भनाइ छ ।

नयाँ भवनमा योग तथा ध्यान हल, फिजियोथेरापी, एक्युपञ्चर, एक्सरे, भिडियो एक्स रे, आधुनिक प्रयोगशालालगायतका सुविधा उपलब्ध हुनुपर्ने उहाँको माग छ । अहिलेको भवनमा सेवाग्राहीका लागि छुट्टै शौचालयको समेत सुविधा उपलब्ध छैन । रासस