शहरी क्षेत्रका बालबालिकामा खोप कार्यक्रम प्रभावकारी कार्यान्वयनमा जोड

चितवन । शहरी क्षेत्रमा खाेप सेवाका कार्यक्रमहरूलाई थप सुदृढीकरण र प्रभाबकारी रूपले कार्यान्वयन गर्न महानगरपालिकाका जनप्रतिनिधी र सराेकारवालाहरूसंगकाे कार्यशाला गाेष्ठी सम्पन्न भएको छ। विश्व स्वास्थ्य संगठनको आयोजनामा आज चितवनस्थित होटल सिराइचुलीमा सरोकारवाला संगको कार्यशाला गाेष्ठी सम्पन्न भएको हो।

पछिल्लो समय ग्रामीण भेगका बालबालिकामा भन्दा शहरी क्षेत्रमा बसोवास गर्ने बालबालिकाहरुमा विभिन्न किसिमका खोप सेवा लिन छुटिरहेकाले ती छुटेका बालबालिकाहरुलाई खोप सेवाको दायरामा ल्याउनका लागि नगर,जिल्ला र प्रदेश स्वास्थ्य संस्थाहरु बीच एक आपसमा समन्वय,सहकार्य र नवीनतम प्रविधिको प्रयोग गरी पूर्ण खोप सेवा कार्यान्वयन गर्नुपर्ने विज्ञहरुको भनाई थियो।

कार्यक्रममा स्रोत व्यक्ताको रुपमा विश्व स्वास्थ्य संगठनका प्रतिनिधि डा.निर्मल झा,स्वास्थ्य निर्देशनालय वागमती प्रदेशका जनस्वास्थ्य प्रशासक दिनेश रुपाखेती,जिल्ला जनस्वास्थ्य कार्यालय चितवनका प्रमुख निर्मल घिमिरे र भरतपुर महानगरपालिका स्वास्थ्य शाखा प्रमुख दिपक सुवेदी रहनु भएको जिल्ला जनस्वास्थ्य कार्यालय चितवनका फोकल पर्सन राम केसी ले बताउनु भयो।

भरतपुर महानगरपालिका स्वास्थ्य शाखाका जनस्वास्थ्य अधिकृत केशव भट्टका अनुसार कार्यक्रममा जिल्ला समन्वय समिति चितवनका प्रमुख नारायण प्रसाद अधिकारी,भरतपुर महानगरपालिकाका उप प्रमुख चित्रसेन अधिकारीसहित जनप्रतिनिधि,विश्व स्वास्थ्य संगठनका प्रतिनिधि,भरतपुर महानगरपालिकामा कार्यरत स्वास्थ्यकर्मीसहित करिब ५० जनाको सहभागिता रहेको थियो। कार्यक्रमको समन्वय जिल्ला जनस्वास्थ्य कार्यालय चितवन र भरतपुर महानगरपालिकाले गरेको हो।