चितवन । मुटु तथा फोक्सो रोगका विशेषज्ञहरुको राष्ट्रिय सम्मेलन चितवनको भरतपुरमा सम्पन्न भएको छ । राष्ट्रिय मुटु तथा फोक्सो रोग समाजको आयोजनामा उक्त सम्मेलन आज सम्पन्न भएको हो ।
समाजको यो पहिलो सम्मेलन भएकाले बिदेशी चिकित्सक बाहेक नेपालका सबै शहरहरुमा कार्यरत मुटु तथा फोक्सो रोग बिशेषज्ञहरुको उपस्थिति रहेको समाजका सचिव डा शंकर लौडारीले बताउनु भयो । डा लौडारीका अनुसार सम्मेलनमा मुटु रोग बिशेषज्ञ,मुटु सल्य चिकित्सक,भास्कुलर सर्जन,फोक्सो रोग तथा जनरल फिजिसियन बिशेषज्ञ सहित सहभागी कार्यक्रममा प्रस्तुत २६ वटा वैज्ञानिक कार्यपत्र माथि छलफल गरिएको थियोे ।
समाजका उपाध्यक्ष प्राडा सुधिर रेग्मीले नेपालमा मुटु तथा फोक्सो रोग बाट प्रभावित बिरामीको सङ्ख्यात्मक अवस्था, रोग लाग्नुका कारणहरु, उपचार पद्धतिमा अत्याधुनिक प्रविधिको उच्चतम प्रयोग बारे छलफल तथा ज्ञान साटासाट भएको बताउनु भयो । यस्ता रोग बारे विज्ञहरुको कार्यअनुभव साथै खोजअनुसन्धान बारे सम्मेलनमा बिशेष छलफल भएको उहांँले बताउनु भयो ।
संस्थाका अध्यक्ष प्राडा मणी प्रसाद गौतमका अनुसार समाजमा यी बिषयका चिकित्सकहरुको सहभागीतामा देशैभर बाट हाल सम्म करिब ६५ जना सदस्यहरु आवद्ध रहेको बताउनु भयो । एक दिने उक्त सम्मेलनमा वरिष्ठ चिकित्सक प्राडा अरुण मास्के, प्राडा दिवाकर शर्मा, प्राडा विजयराज वंशी,प्राडा श्यामराज रेग्मी, प्राडा विजय प्रसाद पौडेल प्राडा सितल अधिकारी लगायत १६८ जना चिकित्सकको सहभागीता रहेको समाजका कार्यालय सचिब रामचन्द्र खत्रीले बताउनु भयो ।
समाजका अध्यक्ष प्राडा गौतमका अनुसार नेपालमा हाल मुटु रोग बिशेषज्ञ २५० जना, कार्डियो थोरासिक सर्जन २५ जना र फोक्सो रोग बिशेषज्ञ करिब ५० जना रहेको तथ्यांक छ ।
