चितवन । स्वास्थ्य दर्पण मिडिया ग्रुपको सल्लाहकार सम्पादकमा सूर्यप्रकाश कँडेल नियुक्त हुनुभएको छ । स्वास्थ्य दर्पणको केन्द्रीय कार्यालय भरतपुरमा बिहीबार सल्लाहकार सम्पादक कँडेललाई स्वागत गरिएको छ ।
स्वास्थ्य दर्पण मिडिया नेटवर्क प्रा.लि.का सल्लाहकारहरू डा. केशव पौडेल र डा. सन्तोष गुरुङ एवं चितवनका वरिष्ठ पत्रकार गणशेखर शर्माले सल्लाहकार सम्पादक कँडेललाई टीका र खादा लगाएर स्वागत गर्नुभएको हो । उहाँहरूले सल्लाहकार सम्पादक कँडेललाई बधाई दिँदै सफल कार्यकालको शुभकामना व्यक्त गर्नुभएको छ ।
स्वास्थ्य दर्पण मिडिया ग्रुपका अध्यक्ष एवं प्रधानसम्पादक सन्दीपकुमार श्रेष्ठले सहजीकरण गर्नुभएको स्वागत कार्यक्रममा स्वास्थ्य दर्पण मिडिया ग्रुपकी सम्पादक बागमती श्रेष्ठको पनि उपस्थिति रहेको थियो ।
चितवनमा रहेर तीन दशकदेखि निरन्तर पत्रकारिता गर्दै आउनु भएका कँडेलले विभिन्न पत्रपत्रिकामा संवाददातादेखि सम्पादकसम्मको भूमिकामा रहेर काम गरिसक्नु भएको छ । ‘चितवन सन्देश’ साप्ताहिकबाट पत्रकारिताको यात्रा सुरु गर्नुभएका कँडेलले यसअघि अन्नपूर्ण पोष्ट दैनिक र नागरिक दैनिकमा गरी करिब दुई दशक संवाददाता भई काम गरिसक्नु भएको छ ।
भरतपुर–४, त्रिचोक निवासी कँडेलले चितवनबाट प्रकाशित हुने चितवन पोष्ट, पारदर्शी, ड्रिम्स र कायाकैरन दैनिकमा सम्पादकीय जिम्मेवारीमा रहेर विगतमा काम गरिसक्नु भएको छ । किरणपुञ्ज दैनिकका प्रधानसम्पादक कँडेल नेपाल पत्रकार महासंघ चितवन शाखाको पूर्वसल्लाहकार समेत हुनुहुन्छ ।
एक दशकअघि रेडियोबाट सुरु भएको स्वास्थ्य दर्पण कार्यक्रम पछि गएर हिमालय टेलिभिजन र नेपाल टेलिभिजनबाट प्रसारण हुन थाल्यो । हाल पाँच वर्षदेखि स्वास्थ्य दर्पण न्यूज डट कम र स्वास्थ्य दर्पण राष्ट्रिय पत्रिका सञ्चालनमा छन् । संस्थाको वार्षिकोत्सवका अवसरमा बृहत् कार्यक्रमको आयोजना गरी स्वास्थ्य क्षेत्रमा योगदान पु¥याएका राष्ट्रिय तथा अन्तर्राष्ट्रियरुपमा प्रसिद्ध व्यक्तित्वहरूलाई सम्मान गर्दै आइरहेको संस्थाका अध्यक्ष श्रेष्ठले जानकारी दिनुभयो ।
