काठमाडौं । नेपाल चिकित्सक संघका अध्यक्ष डा.अनिल विक्रम कार्कीले स्वास्थ्य बीमा कार्यक्रम र अस्पताल–आधारित फार्मेसीहरूमा स्वदेशी औषधिलाई प्राथमिकता दिनुपर्ने बताउनु भएको छ।
नेपाल औषधि उत्पादक संघ (एपोन) को दशौँ संस्करणको एक्सपो कार्यक्रममा बोल्दै उहाँले स्वदेशी औषधि उद्योगलाई प्रोत्साहन गर्नु स्वास्थ्य प्रणाली सुदृढ बनाउनु आजको आवश्यक रहेको बताउनु भएको हो । ‘नेपाल चिकित्सक संघले लामो समयदेखि स्वास्थ्य बीमा कार्यक्रम र अस्पताल–आधारित फार्मेसीमा स्वदेशी औषधिलाई प्राथमिकता दिनुपर्छ भन्ने माग गर्दै आएको छ,’ उहाँले भन्नुभयो, ‘सरकारले पनि स्वदेशी औषधि उद्योगबाट बल्कमा औषधि खरिद गर्ने विषय उठाएको सुन्दा सकारात्मक लागेको छ।’ ‘फार्मामा नवीनता, भोलिका लागि स्वास्थ्य” भन्ने नारासहित आयोजना गरिएको एक्सपो कार्यक्रममा बोल्दै डा. कार्कीले उत्पादक, प्रयोगकर्ता, चिकित्सक, प्रवर्द्धक तथा नियमन गर्ने निकायहरू (स्वास्थ्य मन्त्रालय, औषधि व्यवस्था विभाग र प्रयोगशालाहरू) सबैले सकारात्मक कर्मका साथ अगाडि बढे मात्रै औषधि क्षेत्रमा वास्तविक सुधार सम्भव हुने धारणा राख्नु भएको थियो ।
औषधि उद्योगलाई प्रवर्द्धन गर्न नयाँ प्रविधिसँगै नयाँ उत्पादन र अनुसन्धानमा पनि ध्यान दिनुपर्ने बताउदै । ‘नेपालले पनि विश्वलाई नयाँ औषधि र अनुसन्धानका उपलब्धि दिन सक्ने सम्भावना राख्छ,’ डा.कार्कीले भन्नुभयो । औषधिको मूल्यबारे चर्चा गर्दै डा.कार्कीले नेपालमा एक रुपैयाँमै सिटामोल उपलब्ध हुने अवस्था रहेको उल्लेख गर्दै ‘संसारमा एक रुपैयाँमा सिटामोल पाइने देश नेपाल मात्रै हो,’ उहाँले भन्नु भयो, ‘तर त्यही सस्तो औषधि कहिलेकाहीँ अनौपचारिक बाटोबाट बाहिर जाने समस्या रहेको हुँदा सरोकार निकाय सजक बन्नु पर्ने धारणा व्यक्त गर्नुभएको थियो ।
