कोरोना भगाउन उत्तर कोरियामा अदुवा र मह मिसाएको चिया वा जडीबुटीको तातोपानी खान सल्लाह

प्याेङयाङ । उत्तर कोरियाले अहिले कोरोना भाइरसविरद्धको कुनै एन्टिभाइरल औषधिको पहुँचविना खोप नलिएका नागरिकमाझ फैलिरहेको कोभिड १९ को सामना गरिरहेको छ । २०२० को सुरुतिर मुलुकका चारैतिरका सिमाना बन्द गरेर उत्तर कोरियाले आफूलाई महामारीबाट जोगाउने कोसिस गरेको थियो ।

विगतमा किम जोङ उनको नेतृत्वमा रहेको सरकारले बाह्य चिकित्सकीय सहयोग अस्वीकार गरेको थियो । ‘ज्वरो’संज्ञा दिइएको कोभिड संक्रमणविरुद्ध लड्न अहिले उत्तर कोरियामा परम्परागत विधिहरू अवलम्वन गरिएका छन् ।

सत्तारूढ पार्टीको मुखपत्र रोदोङ सिम्नुनले गम्भीर रूपमा संक्रमण नभएकाहरूलाई अदुवा वा मह मिसाएको चिया वा जडीबुटी पात मिश्रित तातो पानी खान सल्लाह दिएको छ । यस्ता तातो पेय पदार्थले घाँटी दुख्ने वा खोकी लाग्ने जस्ता कोभिडका लक्षणबाट आराम दिलाउने र बिरामीहरूलाई जलविनियोजको समस्याबाट समेत जोगाउन मद्धत पुर्‍याउने बताइएको छ ।

यस्ता पेय पदार्थको सेवनबाट जलन र पीडाबाट पनि मुक्ति दिन सक्छन् । यस सरकारी अखबार सिम्नुनले बिहान बेलुका सरकारले भनेजस्तै नुनपानीले गार्गल गर्दै आएका एक दम्पतिको अन्तर्वार्ता लिएको थियो । ‘एन्टिसेप्टिक झोल’ बनाउनका लागि हजारौ टन बराबरको नुन प्याेङयाङमा पठाइएको छ ।

केही अध्ययनले गार्गाल गर्दा र नुनपानीले नाक पखाल्दा भाइरससँग लड्न सकिने सल्लाह दिएका छन् । तर यस्ता विधिसँग कोभिड संक्रमण फेलिनबाट रोक्ने नगण्य प्रमाण रहेको छ । देशव्यापी कडा लकडाउन लागु गरिएको उत्तर कोरियामा औषधिको सहज वितरणका लागि किमका आदेशमा सेनालाई परिचालन गरिएको छ ।
सरकारी टेलिभिजनले बिरामीहरूलाई इवुप्रोफेन र एमोक्सिल्लिनलगायत अन्य पेनकिलरको पनि प्रयोग गर्ने सल्लाह दिएको छ ।

बिरामीलाई कोभिडबाट जोगाउन मद्धत पुर्‍याउने प्याक्लोभिड, मोल्नुपिराभिर र रेम्डेस्भिर जस्ता केही मान्यता प्राप्त एन्टिभाइरल औषधि पनि छन् ।

ग्रामीणस्तरमा आधाभूत सेवादेखि सरकारी अस्पतालहरूमा विशेष उपचार निशुल्क बनाउन स्वास्थ्य प्रणाली स्थापित गरिएको छ । तर, उत्तर कोरियाबाट भागेर दक्षिण कोरिया पुगेका अधिकांशले स्वास्थ्य उपचारका लागि त्यहाँ पैसा तिर्नुपर्ने बताउँछन् ।

यसैगरी हालै चीनको सेन्याँगबाट चिकित्सकिय सामानहरू ल्याउनका लागि उत्तर कोरियाले तीनवटा विमान पठाएको खबर पनि सार्वजनिक भएको छ ।

बीबीसीबाट ।