खुट्टा र घुडा दुख्ने समस्या पछिल्लो समय सबै उमेर समूहमा देखिन थालेको छ । हाडजोर्नी तथा अर्थोपेडिक विशेषज्ञ डा. सुदिपमान वैद्य का अनुसार, यो समस्या सामान्य देखिए पनि दीर्घकालीन रूपमा गम्भीर रूप लिन सक्ने भएकाले समयमै ध्यान दिन आवश्यक हुन्छ ।
डा. वैद्यका अनुसार घुडा दुख्ने प्रमुख कारणमा अस्थिसन्धि सुन्निने (ओस्टियोआर्थराइटिस), चोटपटक, लिगामेन्ट क्षति, मोटोपन तथा उमेर बढ्दै जाँदा हड्डी कमजोर हुनु पर्दछन् । विशेषगरी लामो समय उभिने, गलत बसाइ–उठाइ र अत्यधिक शारीरिक दबाबले समस्या झन् बढाउने गर्छ ।
त्यसैगरी, खुट्टा दुख्ने समस्या मांसपेशी थकान, नसासम्बन्धी समस्या, रक्तसञ्चारमा अवरोध वा क्याल्सियम र भिटामिन–डीको कमीका कारण पनि हुन सक्छ । आधुनिक जीवनशैलीमा व्यायामको कमी र असन्तुलित खानपानले यस्तो समस्या बढाएको चिकित्सकको भनाइ छ ।
यदि समयमै उपचार नगरिएमा हिँडडुलमा समस्या, जोर्नी बिग्रने तथा दैनिक जीवन प्रभावित हुने जोखिम रहन्छ । त्यसैले लगातार दुखाइ, सुन्निने वा चलाउँदा आवाज आउने जस्ता लक्षण देखिएमा तुरुन्त विशेषज्ञसँग परामर्श लिन सुझाव दिइन्छ ।
समाधानका रूपमा नियमित हल्का व्यायाम, तौल नियन्त्रण, सन्तुलित आहार, फिजियोथेरापी तथा आवश्यक परे औषधि वा शल्यक्रिया अपनाउन सकिन्छ ।
खुट्टा र घुडा दुखाइलाई सामान्य ठानेर बेवास्ता गर्नु जोखिमपूर्ण हुन सक्ने भन्दै डा. वैद्यले समयमै उपचार र सचेत जीवनशैली अपनाउन आग्रह गरेका छन् ।
