काठमाडौँ । ग्राण्डी अन्तर्राष्ट्रिय अस्पतालमा एकीकृत पुनस्र्थापना केन्द्र सञ्चालनमा आएको छ । अस्पतालबाट उपचारपछि डिस्चार्ज भएका बिरामीलाई थेरापीमार्फत पूर्ण रूपमा निको बनाउन केन्द्र सञ्चालनमा ल्याइएको हो ।
केन्द्रको उद्घाटन गर्दै अस्पतालका मेडिकल डाइरेक्टर डा. विनोद विजुक्छेले उपचारपश्चात बिरामीलाई आवश्यक थेरापी सेवा प्रदान गर्न यस केन्द्रले महत्वपूर्ण भूमिका खेल्ने बताउनुभयो । उहाँले बिरामीलाई गुणस्तरीय सेवा दिन कुनै कमी नराखिने पनि उल्लेख गर्नुभयो ।
अस्पतालका वरिष्ठ न्यूरोलोजिस्ट डा. राजु पौडेलका अनुसार स्ट्रोक भएका बिरामीको उपचारपछिको पुनस्र्थापनामा केन्द्रले विशेष सहयोग पुर्याउने जानकारी दिनुभएको थियो ।
केन्द्रमा पोलिट्रमा, स्ट्रोक तथा स्पाइनल कर्ड इन्जुरी भएका बिरामीलाई फिजियोथेरापी, स्पीच थेरापी, अकुपेशनल थेरापी र नर्सिङ सेवा उपलब्ध गराइने छ । पुनस्र्थापना केन्द्रका प्रमुख तथा न्यूरो थेरापिस्ट निमा शेर्पाका अनुसार मानसिक परामर्श, मनोरञ्जनात्मक गतिविधि, सामान्य खेलकुद तथा आध्यात्मिक कार्यक्रमसमेत सञ्चालन गरिनेछ ।
