काठमाडौँ । प्रधानमन्त्री वालेन्द्र शाहले विश्वविद्यालय तथा स्वास्थ्य विज्ञान प्रतिष्ठानका उपकुलपतिसँग छलफल गर्नुभएको छ। सोमबार सिंहदरबारमा आयोजित उक्त छलफलमा प्रधानमन्त्री शाहले उच्च शिक्षा र विशेषगरी स्वास्थ्य क्षेत्रसँग सम्बन्धित समस्याबारे गम्भीर रूपमा विमर्श गर्नुभएको थियो।
उहाँले स्वास्थ्य सेवा प्रवाह, दक्ष जनशक्ति उत्पादन तथा पूर्वाधार विकाससँग सम्बन्धित चुनौतीहरूलाई प्राथमिकताका साथ समाधान गर्न आवश्यक रहेको उल्लेख गर्नुभयो। प्रधानमन्त्री शाहले कतिपय समस्याहरू तत्कालै समाधान गर्न सकिने भन्दै सम्बन्धित निकायलाई त्यसतर्फ सक्रिय हुन निर्देशन दिनुभयो । दीर्घकालीन सुधारका लागि नीतिगत तथा संरचनात्मक परिवर्तन आवश्यक रहेको प्रधानमन्त्रीको भनाइ थियो।
छलफलमा त्रिभुवन विश्वविद्यालय र काठमाडौँ विश्वविद्यालय लगायत विभिन्न विश्वविद्यालयका उपकुलपति सहभागी हुनुभएको थियो। त्यसैगरी पूर्वाञ्चल विश्वविद्यालय, पोखरा विश्वविद्यालय र लुम्बिनी बौद्ध विश्वविद्यालय का उपकुलपतिले पनि आफ्नो संस्थाको अवस्था र चुनौतीबारे जानकारी गराउनुभएको थियो। नेपाल संस्कृत विश्वविद्यालय, सुदूरपश्चिमाञ्चल विश्वविद्यालय र मध्यपश्चिमाञ्चल विश्वविद्यालय का उपकुलपति पनि छलफलमा सहभागी हुनुभएको थियो।
कृषि तथा वनविज्ञान विश्वविद्यालय, राजर्षि जनक विश्वविद्यालय र सहिद दशरथ चन्द स्वास्थ्य विज्ञान विश्वविद्यालय का उपकुलपतिसँग पनि प्रधानमन्त्री साहले संवाद गर्नुभएको थियो। नेपाल विज्ञान तथा प्रविधि प्रज्ञा प्रतिष्ठान, चिकित्सा विज्ञान राष्ट्रिय प्रतिष्ठान, पाटन स्वास्थ्य विज्ञान प्रतिष्ठान र विपी कोइराला स्वास्थ्य विज्ञान प्रतिष्ठान का उपकुलपतिसँग स्वास्थ्य शिक्षा, अनुसन्धान र सेवा विस्तारका विषयमा छलफल भएको थियो ।
यसैगरी, कर्णाली स्वास्थ्य विज्ञान प्रतिष्ठान, पोखरा स्वास्थ्य विज्ञान प्रतिष्ठान र राप्ती स्वास्थ्य विज्ञान प्रतिष्ठान का उपकुलपतिले क्षेत्रीय स्वास्थ्य सेवामा देखिएका समस्या तथा सुधारका उपायबारे सुझाव दिइएको थियो।
प्रधानमन्त्री शाहले स्वास्थ्य क्षेत्रको गुणस्तर सुधार, जनशक्ति व्यवस्थापन र सेवा पहुँच विस्तारमा सरकार गम्भीर रहेको बताउनुभयो। उहाँले सबै प्रतिष्ठान र विश्वविद्यालयलाई समन्वय गरेर अघि बढ्न आग्रह गर्दै सुधारका लागि प्राप्त सुझावहरूलाई कार्यान्वयनमा लैजाने प्रतिबद्धता व्यक्त गर्नुभयो।
