बाबु शिवबहादुर अर्यालले गाउँमा मेडिकल सञ्चालन गरी हालको सहिद लखन गाउँपालिकाअन्तर्गतका जनतालाई प्रदान गर्नुभएको स्वास्थ्य सेवाबाट प्रभावित विनोद अर्यालले आफ्नो भविष्य स्वास्थ्य क्षेत्रमै देख्नुभयो र सिएमए अध्ययन सुरु गर्नुभयो । सिएमएको अध्ययन सम्पन्न गरेपछि उहाँले गाउँमा सञ्चालित मेडिकललाई सदरमुकाममा स्थानान्तरण गरी व्यवस्थित गर्दै थप सेवा विस्तार गर्नुभयो । २०५६ सालदेखि गोर्खा नगरपालिका वडा नम्बर ७, नयाँ बजारमा ‘अर्याल मेडिकल हल’ खोलेर व्यावसायिक जीवन सुरु गर्नुभएका उहाँले हालसम्म लाखौँ बिरामीको उपचारमा सहजीकरण गरिसक्नुभएको छ ।
सानै उमेरदेखि सामाजिक कार्यमा रुचि राख्ने उहाँ व्यावसायिक जीवनसँगै विभिन्न सामाजिक संघ–संस्थामा संलग्न भई समाजमा पछाडि परेका तथा पारिएका नागरिकहरूको सेवामा तल्लीन रहँदै आउनुभएको छ । उहाँले गोर्खामा नेपाल सिएमए संघको नेतृत्व गरिसक्नुभएको छ भने हाल नेपाल औषधि व्यवसायी संघ गोर्खा, श्री जेनियस गोर्खा इङ्लिस बोर्डिङ स्कुल, पश्चिमकाली तथा खड्गदेवी मन्दिरको अध्यक्ष पदमा रही कार्यरत हुनुहुन्छ । हेड्स नेपाल, मानवअधिकार तथा शान्ति समाज, धारापानी खानेपानी तथा उपभोक्ता समिति, प्याब्सन गोर्खालगायत सामाजिक संघ–संस्थामा सदस्यका रुपमा रही उहाँले समाजमा व्यक्तिगत तथा सामूहिक सेवामा उल्लेखनीय योगदान पुर्याउनुभएको छ ।
अर्यालले हालसम्म सिङ्गापुर, भारत, इन्डोनेसिया, रसिया, चीन, दुबई, जापान, थाइल्याण्डलगायत देशहरूको भ्रमण गरिसक्नुभएको छ । गोरखामा सफल व्यवसायीका रुपमा आफ्नो पहिचान स्थापित गराउनु भएका अर्यालले मानवीय सेवालाई आफ्नो जीवनको मूलमन्त्रका रुपमा अघि बढाउँदै आउनुभएको छ । सफल युवा उद्यमीका रुपमा २०७५ सालमा नेपाल युवा परिषदबाट उहाँ पुरस्कृत समेत हुनुभएको थियो ।
मानवीय सेवाको यात्राकै क्रममा सन् २०१६ मा उहाँ रोटरीको सदस्य बन्नुभयो । रोटरी क्लब बज्र मनास्लु गोर्खाको संस्थापक सदस्य हुँदै विभिन्न निर्देशक तथा पदाधिकारी जस्ता महत्वपूर्ण पदमा सक्रिय रहँदै आउनुभएका उहाँ सन् २०२५–२६ का लागि अध्यक्षमा चयन हुनुभएको छ । रोटरी अभियानमा संलग्न भएपछि सामाजिक तथा मानवीय सेवामा थप प्रेरित बनेको अनुभूति गर्दै उहाँले आगामी दिनहरू रोटरी अभियानमै समर्पित गर्ने संकल्प गर्नुभएको छ । रोटरी क्लब बज्र मनास्लुको दशौँ अध्यक्षका रुपमा निर्वाचित भएपछि उहाँले आफ्नो कार्यकाल सफल बनाउने तथा रोटरी अभियानलाई अझ सशक्त बनाउने उद्देश्यले विभिन्न योजनाहरू समेत तयार गर्नुभएको छ ।
‘आफूभन्दा माथि सेवा’ भन्ने मूलमन्त्रलाई आत्मसात् गर्दै रोटरियन अर्यालले आगामी जीवन यही सेवायात्रामा सहयात्रीका रुपमा अघि बढाउने चाहना व्यक्त गर्नुभएको छ । यसै अभियानमा थप योगदानस्वरुप रोटरी क्लब बज्र मनास्लुको भवन निर्माणका लागि गोरखा नगरपालिका वडा नम्बर ६, बसपार्क नजिकै तीन आना जग्गा समेत उहाँले दान गर्नुभएको छ । उहाँको यो निःस्वार्थ सामाजिक तथा मानवीय सहयोगको भावनालाई अगाडि बढाउन हामी सबैले होस्टेमा हैँसे गर्न जरुरी देखिन्छ ।
