नवलपुर । अपाङ्गता अवस्थामा रहेका बालबालिकाहरूको दैनिक जीवन सहज बनाउन सहयोग हस्तान्तरण कार्यक्रम सम्पन्न भएको छ। भरतपुरस्थित समिट हेल्थकेयर अस्पताल प्रा.लि.ले कावासोतीमा रहेको श्री मौलिकालिका अपाङ्ग सेवा संस्थालाई आवश्यक स्ट्रेचर, ह्वीलचेयर, खाद्यान्न तथा नगद रु. ३० हजार सहित करिब रु. ६० हजार बराबरको सहयोग प्रदान गरेको हो।
कार्यक्रममा अस्पताल सञ्चालक तथा वरिष्ठ नसा तथा हाडजोर्नी रोग विशेषज्ञ डा. गौरव न्यौपानेले अपाङ्गता भएका बालबालिकाको जीवनयापन सहज बनाउन अस्पतालको तर्फबाट सहयोग गरिएको जानकारी दिनुभयो। संस्थाका तर्फबाट सहयोग ग्रहण गर्दै अपाङ्ग सेवा संस्थाकी संचालिका सबिना गिरिले भाबुक हुँदै सहयोगका लागि अस्पताल परिवारप्रति आभार व्यक्त गर्नुभयो। सहयोग हस्तान्तरण कार्यक्रममा अस्पतालका तर्फबाट ईश्वर न्यौपाने, शोभा न्यौपाने तथा विराज खनालको उपस्थिति रहेको थियो। त्यसैगरी अपाङ्ग सेवा संस्थाका पदाधिकारी, जनप्रतिनिधिको समेत उपस्थिति रहेको थियो ।
कार्यक्रममा सञ्चारकर्मी के.बी. रानाले अपाङ्गता भएका बालबालिकाको जीवनस्तर सुधार गर्न समुदाय, स्वास्थ्य संस्था र सरोकारवाला निकायबीच सहकार्य आवश्यक रहेको बताउनुभयो। हाल यस संस्थामा २३ जना शारीरिक रूपमा अशक्त बालबालिकाहरू रहेका छन्।
