कपोलकल्पित विज्ञापन नियन्त्रण गर्न विज्ञापन बोर्डलाई औषधि व्यवस्था विभागको अनुरोध

काठमाडौँ । औषधिको नाममा विभिन्न सञ्चार माध्यम, अनलाइन प्लेटफर्म तथा सामाजिक सञ्जालमार्फत प्रसारण भइरहेका भ्रामक, अप्रमाणित र कपोलकल्पित विज्ञापन नियन्त्रण गर्न औषधि व्यवस्था विभागले विज्ञापन बोर्डलाई अनुरोध गरेको छ।

विभागका अनुसार पछिल्लो समय विभिन्न वस्तु तथा सेवाहरूलाई औषधिको रूपमा प्रचार गर्दै वैज्ञानिक प्रमाणबिनै अतिरञ्जित दाबी गर्ने, रोग निको हुने सुनिश्चितता दिने तथा भ्रामक प्रचार सामग्री प्रसारण गर्ने क्रम बढ्दो छ। यस्ता गतिविधिप्रति विभागले गम्भीर ध्यानाकर्षण भएको उल्लेख गरेको छ।

विभागले विज्ञापन बोर्डलाई पत्राचार गर्दै यस्ता विज्ञापनले सर्वसाधारणलाई भ्रममा पार्नुका साथै जनस्वास्थ्यमा नकारात्मक असर पार्ने भएकाले तत्काल नियन्त्रण आवश्यक रहेको जनाएको हो। पत्रमा औषधि ऐन, २०३५ तथा औषधि दर्ता नियमावली, २०३८ अनुसार औषधि व्यवस्था विभागबाट स्वीकृति प्राप्त नगरी कुनै पनि औषधिसम्बन्धी विज्ञापन प्रकाशन, प्रसारण वा प्रचारप्रसार गर्न नपाइने कानुनी व्यवस्था रहेको स्मरण गराइएको छ।

विभागले विज्ञापन बोर्डलाई स्वीकृतिविहीन औषधिसम्बन्धी विज्ञापन रोक्न आवश्यक पहल गर्न तथा सम्बन्धित निकायलाई निर्देशन दिन आग्रह गरेको छ। पत्रमा कुनै पनि औषधिको विज्ञापन प्रसारण गर्नु अघि विभागबाट स्वीकृति प्राप्त भए–नभएको अनिवार्य रूपमा यकिन गर्न पनि अनुरोध गरिएको छ।

विभागका वरिष्ठ औषधि व्यवस्थापक किरण सुन्दर बज्राचार्यद्वारा हस्ताक्षरित उक्त पत्रमा सर्वसाधारणको स्वास्थ्यसँग प्रत्यक्ष सरोकार रहने विषय भएकाले सञ्चारमाध्यम र विज्ञापनसम्बन्धी निकायलाई जिम्मेवार बन्न आग्रह गरिएको छ। स्वास्थ्य क्षेत्रका विज्ञहरूले पछिल्लो समय सामाजिक सञ्जालमा “चमत्कारी औषधि”, “१०० प्रतिशत रोग निको हुने”, “तुरुन्त असर गर्ने” जस्ता दाबी सहितका विज्ञापन तीव्र रूपमा बढेकाले नियमन प्रभावकारी बनाउनुपर्ने आवश्यकता औंल्याउँदै आएका छन्।