काठमाडौं । नेपाल मेडिकल काउन्सिलको पूर्ण बैठकले आगामी आर्थिक वर्षदेखि चिकित्सक दर्ता प्रमाणपत्र (लाइसेन्स) परीक्षा काठमाडौं उपत्यकाबाहिर पनि सञ्चालन गर्ने निर्णय गरेको छ।
काउन्सिलले ‘नेशनल मेडिकल रजिस्ट्री’ निर्माण प्रक्रिया अघि बढाउने तथा दर्ता भएका सबै चिकित्सकहरूको डिजिटल प्रोफाइल तयार गर्ने निर्णय पनि गरेको छ। यससँगै काउन्सिलको वेबसाइटमा चिकित्सकहरूको शैक्षिक योग्यता र डिग्री सम्बन्धी विवरण नियमित अद्यावधिक गरिनेछ।
काउन्सिलले अवैध चिकित्सकीय अभ्यास नियन्त्रणका लागि ‘एन्टी–क्वेकरी गाइडलाइन, २०८३’ लाई सैद्धान्तिक स्वीकृति प्रदान गर्दै अन्तिम स्वीकृतिका लागि स्वास्थ्य मन्त्रालयमा पठाउने निर्णय गरिएको छ।
काउन्सिलको ऐन तथा नियमावली संशोधनका लागि कार्यवाहक अध्यक्ष डा. कुन्जाङ शेर्पाको संयोजकत्वमा कार्यदल गठन गरिएको छ। कार्यदलले तीन महिनाभित्र प्रतिवेदन पेश गर्नेछ।
काउन्सिलका निमित्त रजिस्ट्रार डा. दिपेन्द्र पाण्डे का अनुसार यी निर्णयले स्वास्थ्य सेवा नियमन र चिकित्सकीय अभ्यासलाई थप व्यवस्थित बनाउन सहयोग पुग्ने अपेक्षा गरिएको छ।
