चितवन । पुष्पाञ्जली अस्पताल प्रा.लि. भरतपुरले संक्रमण रोकथाम तथा नियन्त्रणसम्बन्धी तीनदिने तालिम सम्पन्न गरेको छ । संक्रमण रोकथाम तथा नियन्त्रण कार्यलाई थप प्रभावकारी बनाउने उद्देश्यले आयोजना गरिएको उक्त तालिम शनिबारदेखि सोमबारसम्म सञ्चालन गरिएको थियो ।
अस्पताल परिसरमा आयोजित तालिममा प्रशिक्षकहरू विष्णुकुमारी श्रेष्ठ, कमला रेग्मी र सुमित्रा पराजुलीले संक्रमण रोकथाम, स्वास्थ्य संस्थाभित्र अपनाउनुपर्ने सुरक्षा सतर्कता, सरसफाइ व्यवस्थापन, व्यक्तिगत सुरक्षा सामग्रीको सही प्रयोग तथा बिरामी र स्वास्थ्यकर्मीको सुरक्षासम्बन्धी विषयमा सहजीकरण गर्नुभएको थियो । तालिममा सहभागी स्वास्थ्यकर्मीहरूले यसबाट आफ्नो पेशागत कार्यका लागि थप व्यावहारिक ज्ञान हासिल भएको बताउँदै यसले आफू तथा बिरामीको उपचार र हेरचाहको गुणस्तर अभिवृद्धिमा सहयोग पुग्ने विश्वास व्यक्त गर्नुभएको थियो ।
तालिम समापन कार्यक्रममा बोल्दै अस्पतालका सञ्चालक तथा बरिष्ठ फिजिसियन डा.भोजराज अधिकारीले तालिमबाट प्राप्त ज्ञान र सीपलाई व्यवहारमा उतार्न आग्रह गर्नुभएको थियो । उहाँले यसबाट कार्यक्षमता अभिवृद्धि हुनुका साथै सुरक्षित कार्यशैलीको विकास हुने भएकाले स्वास्थ्यकर्मीहरूले आफू र बिरामीप्रति संवेदनशील भई सेवा प्रवाह गर्नुपर्नेमा जोड दिनुभयो । समापन समारोहमा अस्पतालका प्रबन्ध निर्देशक सुजन अधिकारी, व्यवस्थापक सुमन खनाल र नर्सिङ्ग कन्सल्टेन्ट बबिता घिमिरे लगाायतको उपस्थिति रहेको थियो ।
पछिल्लो समय स्वास्थ्य संस्थाहरुमा यस खाले तालिमहरु सञ्चालन हुदैं आएको छ ।
