मेटाबोलिक सिन्ड्रोमले मुटुरोग र मधुमेहको जोखिम बढाउँछ : डा. शशांककुमार सिंह (भिडियो)

काठमाडौं । वरिष्ठ फिजिसियन डा. शशांककुमार सिंहले मेटाबोलिक सिन्ड्रोमलाई पछिल्लो समय बढ्दो जनस्वास्थ्य चुनौतीका रूपमा चित्रण गर्दै समयमै पहिचान र जीवनशैलीमा सुधार नगरे यसले टाइप–२ मधुमेह, मुटुरोग, हृदयघात र स्ट्रोकजस्ता गम्भीर रोग निम्त्याउन सक्ने बताउनुभएको छ।

उहाँका अनुसार मेटाबोलिक सिन्ड्रोम कुनै एउटै रोग नभई शरीरमा एकैसाथ देखिने विभिन्न जोखिम कारकहरूको समूह हो। पेटको वरिपरि अत्यधिक बोसो जम्नु, उच्च रक्तचाप, रगतमा चिनीको मात्रा बढ्नु, ट्राइग्लिसराइडको मात्रा उच्च हुनु तथा एचडीएल (राम्रो कोलेस्ट्रोल) को मात्रा कम हुनुजस्ता अवस्थामध्ये कम्तीमा तीनवटा देखिएमा मेटाबोलिक सिन्ड्रोम भएको मानिन्छ।

अस्वस्थ खानपान, शारीरिक गतिविधिको कमी, मोटोपना, धूम्रपान, अत्यधिक मदिरा सेवन, वंशानुगत कारण तथा बढ्दो उमेर यसको प्रमुख जोखिम कारक रहेको उल्लेख गर्दै डा. सिंहले समयमै परीक्षण र उपचार नगरे फ्याटी लिभर, मिर्गौलासम्बन्धी समस्या तथा अन्य दीर्घकालीन जटिलता समेत देखिन सक्ने बताउनुभयो।

उहाँले नियमित व्यायाम, सन्तुलित आहार, तौल नियन्त्रण, धूम्रपान र मदिरा सेवनबाट टाढा रहने तथा नियमित रूपमा रक्तचाप, रगतमा चिनी र कोलेस्ट्रोल परीक्षण गराउने बानी बसाल्न आग्रह गर्नुभयो। जीवनशैलीमा सकारात्मक परिवर्तन नै मेटाबोलिक सिन्ड्रोमबाट बच्ने सबैभन्दा प्रभावकारी उपाय भएको उहाँको भनाइ छ।