भद्रपुर । यहाँको अर्जुनधारामा स्वास्थ्यसम्बन्धी सचेतना कार्यक्रमसँगै स्थानीयवासीलाई लक्षित गरी निःशुल्क स्वास्थ्य परीक्षण शिविर तथा औषधिमा छुट दिने कार्यक्रम आयोजना हुने भएको छ । बागेडाँगी सामुदायिक विकास केन्द्रको आयोजना तथा एन्जल फाउण्डेशनको प्राविधिक सहयोगमा सोमबार अर्जुनधारा–५ स्थित केन्द्रको सभाहलमा प्राथमिक उपचार तथा गुप्त रोगसम्बन्धी एकदिने स्वास्थ्य सचेतना कार्यक्रम सम्पन्न भएको हो ।
कार्यक्रममा हृदयघात, सर्पदंश, आगलागीबाट हुने चोटपटक, करेन्ट लाग्दा अपनाउनुपर्ने प्राथमिक उपचारका उपाय तथा गुप्त रोगसम्बन्धी एक सय तीन जना सहभागीलाई सचेतना दिइएको केन्द्रका अध्यक्ष टेकनाथ अधिकारीले बताउनुभयो । सचेतना कार्यक्रमसँगै भोलिसुगर र प्रेसर परीक्षण तथा बिहीबार पाइल्स, फिसर र फिस्टुलाको रोकथाम तथा उपचारसम्बन्धी स्वास्थ्य शिविर सञ्चालन गरिने आयोजकले जनाएको छ । शिविरमा स्वास्थ्य परीक्षण निःशुल्क गरिने र आवश्यक औषधिमा ५० प्रतिशत छुट उपलब्ध गराइने केन्द्रका अध्यक्ष अधिकारीले जानकारी दिनुभयो ।
अर्जुनधारा नगरपालिकाकी कार्यपालिका सदस्य चन्द्रकुमारी तामाङले स्वास्थ्य र उपचारसम्बन्धी जानकारीको अभाव रहेका समुदायमा यस्ता कार्यक्रम प्रभावकारी हुने बताउनुभयो । उहाँले आगामी दिनमा पनि स्थानीयस्तरमा स्वास्थ्य सचेतना र परीक्षणका कार्यक्रमलाई निरन्तरता दिनुपर्नेमा जोड दिनुभयो।रासस
