नारायणी अस्पतालमा क्याथ ल्याब सेवा सुरु

ll पवनप्रसाद साह ll

वीरगञ्ज । वीरगञ्जस्थित नारायणी अस्पतालमा क्याथ ल्याब सेवा औपचारिक रूपमा सञ्चालनमा आएको छ । अस्पतालको नवनिर्मित सुपर स्पेसियालिटी भवनमा जडान गरिएको क्याथ ल्याबबाट सेवा सुरु गरिएको अस्पतालले जनाएको छ । सेवा सुरु भएसँगै दुई जना बिरामीको परीक्षण तथा उपचार गरिएको छ । वीरगञ्ज–१४, नगवाका ४० वर्षीया मनोज देवीको CAG (Coronary Angiography) तथा वीरगञ्जका ४० वर्षीय जगदीश महतोको Cinefluoroscopy गरिएको अस्पतालले प्रेस विज्ञप्तिमा उल्लेख छ ।

क्याथ ल्याब सेवा सञ्चालनका क्रममा कार्डियोलोजी विभागका प्रमुख डा. अरुणकुमार कर्ण, डा. सुजेश पाठक, एनेस्थेसिया विशेषज्ञ डा. अमितकुमार चौधरी, डा. इमरान खानलगायत स्वास्थ्यकर्मी संलग्न रहेका थिए । त्यस्तै, एनेस्थेसिया असिस्टेन्ट तथा स्टाफ नर्सहरूको समेत उपचार प्रक्रियामा सहभागिता रहेको अस्पतालले जनाएको छ ।

सघन सहरी तथा भवन निर्माण आयोजनाबाट निर्माण सम्पन्न भई नारायणी अस्पताललाई हस्तान्तरण गरिएको सुपर स्पेसियालिटी भवनमा क्याथ ल्याब सेवा सञ्चालनमा आएपछि मुटुसम्बन्धी परीक्षण तथा उपचारका लागि बिरामीलाई थप सुविधा उपलब्ध हुने अपेक्षा गरिएको छ ।अस्पतालका निमित्त प्रमुख मेडिकल सुपरिटेन्डेन्ट डा. चितरञ्जन शाहले सेवा सञ्चालनसम्बन्धी विवरण सार्वजनिक गर्दै सर्वसाधारणलाई यसबारे जानकारी गराएका छन् ।