अर्घाखाँची । शितगंगा नगरपालिका स्वास्थ्य शाखाको आयोजनामा शितगंगा नगरपालिका सबै वार्डमा गर्भवतीहरूको लागि अल्ट्रासाउन्ड गर्ने कार्यको सुरुवात गरिएको छ । वडा नं. १ सुवर्णखालको सहरी स्वास्थ्य केन्द्रबाट गर्भवतीहरूको लागि ग्रामीण अल्ट्रासाउन्ड गरी उक्त कार्यक्रमको थालनी गरिएको हो । नगरमा रहेका चौध वटा वडामा पुग्नेगरी कार्यतालिका बनाएरै अल्ट्रासाउन्ड गर्ने कार्यको सुरुवात गरिएको छ ।
नगरपालिकाले प्राथमिक उपचारमा समेत पछाडि रहेका गाँउहरुमा चिकित्सक सहितका अन्य विभिन्न शिविर समेत सञ्चालन गर्ने तयारी गरेको छ ।
गर्भवती महिलाहरू शारीरिक रुपमा समेत कमजोर हुने भएकोले यो सेवा पहिलो चरणमा सुरु गरिएको नगर प्रमुख छविलाल पौडेलले बताउनु भयो ।
अल्ट्रासाउन्ड गर्नका लागि बुटवलसम्म जाने गर्भवती महिलाहरूका लागि नगरपालिकामा समेत सेवा लिन सकिन्न भन्ने विश्वास दिलाउन समेत यसले सहयोग पुर्याएको उपमेयर गीता भाटले बताउनु भयो ।
नगरपालिकाको तर्फबाट भएको सानो प्रयासले वडाहरूमा भएका अप्ठ्यारोहरू लाई समेत सहज होस भन्दै सबै वडामा यो सेवा सुरु गर्न लागिएको बताउनु भयो । महिलाहरूको प्राथमिक उपचारमा समेत यसले सहज हुने अपेक्षा रहेको बताउनु भयो ।
ग्रामीण क्षेत्रका सम्पुर्ण गर्भवती आमाको अवस्था र बच्चाको अवस्था कस्तो छ भनी ग्रामीण अल्ट्रासाउन्ड मार्फत जाँच्ने र अवस्था अनुसार नियमित फलोअप माल्याएर गर्भवती अवस्थालाई नियमित रुपमा स्वास्थ्य चौकीमा जाँच्ने उद्देश्यले यो कार्यक्रम सञ्चालन गरिएको स्वास्थ्य शाखा प्रमुख नमनारायण बेल्बासेले बताउनु भयो ।
उहाँले सबै ग्रामीण महिलाको पहुँचका लागि समेत यो सेवा सुरु गरिएको बेल्बासेले बताउनु भयो । वडाहरूमा विभिन्न समयमा गर्ने भएपनि प्राथमिक स्वास्थ्य केन्द्रमा हरेक समय जाँच हुने बताउनु भयो ।
