भक्तपुर ।परीक्षामा सहभागी हुनका लागि फाराम भर्न पाउनुपर्ने माग राख्दै विभिन्न जिल्लाबाट आएका दुई सय विद्यार्थीले आज सानोठिमीस्थित चिकित्सा सेवा आयोगको प्राङ्गणमा दिनभर धर्ना दिएका छन् ।
स्वास्थ्य, शिक्षातर्फ स्नातक तहको एमबिबीएस, बिडीएस, बी फार्मेसीलगायतका विभिन्न विषयमा अध्ययनका लागि प्रवेश परीक्षामा सहभागी हुन फाराम भर्न पाउनुपर्ने माग राख्दै विद्यार्थीहरू धर्ना बसेका हुन् ।
एमबिबीएसको अध्ययनका लागि प्रवेश परीक्षाका लागि सर्लाहीबाट आवेदन फाराम भर्न आउनुभएका अरबी बस्नेतले आयोगकै लापरवाहीका कारण परीक्षामा सहभागी हुन फाराम नै बुझाउन नपाएको बताउनुभयो ।
“माघ २२ गतेसम्म प्रवेश परीक्षाको शुल्क बुझाउने र २४ गतेसम्म आवेदन फाराम बुझाउने मिति तय गरेको रहेछ, धेरै विद्यार्थीले २४ गते नै शुल्क र फाराम बुझाउन मिल्छ भनेर २३ र २४ गते आए, उनीहरूले यत्तिकै वञ्चित हुनुप¥यो”, उहाँले भन्नुभयो, “त्यसअघि आउने विद्यार्थीले पनि कर्मचारीले सर्भरडाउन भयो भन्ने र खाजा खान दुई घण्टा बिताउने गर्दा फाराम बुझाउन पाएनन्, त्यसैले एक दिनका लागि दोब्बर दस्तुर लिएर भए पनि प्रवेश परीक्षाको आवदेन दिन पाउनुपर्ने माग गर्दै दुई दिनदेखि आयोगमा धर्ना दिएका हाँै ।”
बिएससी नर्सिङका आवेदन दिन सप्तरीबाट आउनुभएकी अञ्जली चौधरी, नेपालगञ्जबाट आउनुभएकी सुदीपा शाक्य, मोरङबाट आउनुभएकी दिव्या अर्याल, नवाकोटबाट आउनुभएकी केकी तामाङसम्मले टाढा जिल्लाबाट आएका विद्यार्थी आवेदन फाराम बुझाउन नपाएर अलपत्र परेको भन्दै धर्नामा बस्दा पनि माग सुनुवाइ नभएको बताउनुभयो ।
धनुषाबाट आउनुभएका सन्तोषकुमार यादव र इन्द्रजीत यादवले परीक्षामा सहभागी हुन पाऊँ भन्दा पनि वञ्चित गर्न नहुने भन्दै आयोगका पदाधिकारीलाई भेटेर दुई सय जनाको हस्ताक्षरित पत्र बुझाउन खोज्दा पनि भेट नदिएको बताउनुभयो ।
एक दिन समय नदिँदा दुई सय विद्यार्थीको स्वास्थ्य क्षेत्रमा उच्च शिक्षा हासिल गर्ने अवसरबाट वञ्चित हुनुपरेको र भविष्य अन्योल भएको विद्यार्थीको धर्नामा साथ दिँदै आउनुभएका युवराज सफलले बताउनुभयो । उहाँले आजै प्रधानमन्त्री पुष्पकमल दाहाल ‘प्रचण्ड’का प्रमुख राजनीतिक सल्लाहकार हरिबोल गजुरेललाई यसबारे जानकारी गराएको बताउनुभयो ।
यसबारेमा आयोगका पदाधिकारीसँग जानकारी लिन खोज्दा प्रहरीले आयोगको कार्यालयमा प्रवेश गर्न रोक लगाएको थियो भने फोनमा सम्पर्कसमेत हुन सकेन । रासस
