काठमाडौं । हङकङ अन्ततः ‘मास्क फ्री’ हुँदैछ । ९४५ दिनमा पहिलो पटक हङकङले सार्वजनिक स्थलहरूमा अनिवार्य मास्कको लगाउनु पर्ने नियम बुधवार (भोलि)बाट हट्दैछ ।
कोरोना भाइरसको महामारी शुरु भएयता मास्क अनिवार्य बनाइएको थियो । यति लामो समयसम्म कोभिडका कारण मास्क अनिवार्य बनाउने हङकङ एक मात्रै देश थियो ।
बुधवारदेखि घरभित्र बाहिर निस्कँदा मास्क अनिवार्यरूपमा लगाउनु नपर्ने हङकङका नेता जोन लिले मंगलवार पत्रकारहरूसमक्ष बताएका छन् । ‘भोलिदेखि हामीहरू पूर्णरूपमा सामान्य स्वरूपमा फर्किनेछौं,’ लिले भनेका छन् ।
यो वर्ष र आगामी वर्ष आफूहरूले अर्थतन्त्र र विकासमा ध्यान दिने पनि उनले बताएका छन् । वित्तीय केन्द्रलाई पुनःजीवित गर्न सरकारले पयर्टक र सीमापारबाट कामदारहरू आकर्षित गर्न खोजिरहेकै समयमा यो कदम चालिएको हो ।
सन् २०१९ मा हिंस्रक प्रदर्शन भएयता हङकङले शहर बन्द गरेको थियो । सांगीतिक कार्यक्रम र अन्य खेल प्रतियोगिताहरू पनि ठप्पै भएका थिए ।
यो वर्षको शुरुमै भने हङकङले कोभिडसम्बद्ध अन्य प्रतिबन्धहरू हटाएको थियो ।
मास्क अनिवार्य लगाउनु पर्ने नियमका कारण मानिसहरू हङकङ जान मन पराउँदैनथे । सन् २०२० जुलाई २९ देखि शहरले आउटडोरसमेत सबै सार्वजनिक स्थलहरूमा मास्क अनिवार्य बनाएको थियो । यो नियम तोड्नेलाई १० हजार हङकङ डलरसम्म जरिवाना तिराइएको थियो ।
यो खबरसँगै हङकङमा पयर्टन क्षेत्रका कम्पनीहरूको शेयर बढेको छ । यो कदम आगन्तुकहरूलाई आकर्षित गर्न लक्षित छ । हेलो हङकङ अभियानअन्तर्गत शहरले बुधवारदेखि ५ लाखभन्दा धेरै हवाई टिकट निःशुल्क बाँड्दैछ ।
पछिल्लो समय पयर्टक आगमन निकै न्यून छ । जनवरीमा विमानस्थलमा यात्रीको संख्या चार वर्ष अघिको भन्दा एक तिहाई मात्रै थियो । सिंगापुरमा यो अनुपात ७७ प्रतिशत छ । कम्तिमा अहिलेका लागि पयर्टकहरूले सडकमा मास्क लगाउनै पर्ने वा नलगाएमा जरिवानामा परिने चिन्ता गर्नु पर्दैन ।
विगत तीन वर्षमा कोभिडको नियन्त्रणका लागि चालिएका कदमहरूले हङकङको अर्थतन्त्र चौपट पारेको छ । वित्तीय हब र पर्यटकीय गन्तव्यको रूपमा शहरको प्रतिष्ठा पनि ध्वस्त भएको छ । सन् २०२२ मा त्यहाँको अर्थतन्त्र साढे ३ प्रतिशतले खुम्चिएको थियो । यो चार वर्षभित्रको तेस्रो संकुचन थियो । स्थानीय बासिन्दाहरू विश्वका अन्य शहरमा भाग्ने क्रम जारी रहँदा २०२२ सम्ममा शहरको खूद जनसंख्या घटेको थियो । एजेन्सी
