भरतपुर अस्पतालमा ओपिडीको टिकट समय थप : बिहान ७ बजेदेखि सेवा दिन शुरु

चितवन । भरतपुर अस्पतालमा बहिरंग सेवा –ओपीडी सेवा लिन आउने विरामीको लागि अस्पतालले बिहानैदेखि सेवा दिने भएको छ । अस्पतालमा पछिल्लो समय ओपिडी जाँच गर्न आउँने बिरामीको चाप बढ्न थालेपछि सेवाग्राहीको सहजताको लागि ओपिडी टिकड काउन्टर बिहान ७ बजेदेखिनै खोल्न लागेको हो ।
यसअघि बिहान ८ बजेदेखि अस्पतालले ओपिडी टिकट काउन्टर खोल्ने गरेको थियो । नेपाल सरकारले जेठदेखि शनिबार र आइतजार सार्वजनिक विदा दिएसंँगै विरामीको चाप बढ्ने भएकोले ७ बजेदेखिनै सेवा दिन शुरु गर्न लागिएको अस्पताको मेसु डाक्टर कृष्ण पौडेलले जानकारी दिए ।

विरामीको चापलाई मध्यनजर गर्दै यसअघि अस्पतालले ओपिडी काउण्डर मध्यान्ह १२ बजेसम्म खोल्दै आएकोमा आधा घण्टा थप गरी मध्यान्ह १२ ः ३० सम्म थप गरेको छ । यो प्रक्रिया सोमबार देखि शुक्रबारसम्म बिदाको दिन बाहेक लागू हुनेछ ।

यस्तै अस्पतालले आइतवार सार्वजनिक विदाको दिन पनि निजी अस्पतालको तुलनामा कम शुल्कमा बिहान ९ः३० देखि दिउँसो १ बजेसम्म बिरामीलाई ओपिडी जँचाउने व्यवस्था मिलाएको डाक्टर पौडेलले बताए ।