स्वास्थ्य शिविरमा एक हजारभन्दा बढीले लिए सेवा

किमाथाङ्का (सङ्खुवासभा) । सङ्खुवासभाको दुर्गम उत्तरी क्षेत्र भोटखोला गाउँपालिकाले सञ्चालन गरेको निःशुल्क स्वास्थ्य शिविरमा एक हजारभन्दा बढी नागरिकले स्वास्थ्य सेवा लिएका छन् ।

यातायातको पहुँच नपुगेको भोटखोलामा विपन्नता र ज्याला मजदुरी गरी जीविका चलाइरहेका नागरिक घरआँगनमै निःशुल्क उपचार तथा औषधि पाएपछि खुसी व्यक्त गरेका छन् । जिल्लामा एक सरकारीसहित तीन अस्पताल छन् । जिल्ला अस्पताल सङ्खुवासभामा विशेषज्ञ सुविधा पनि छ । तर दुर्गम बस्तीको स्वास्थ्य अवस्था भने निकै नै कमजोर छ । भौगोलिक हिसाबले दुर्गम भोटखोलाका अधिकांश नागरिकलाई साँझ–बिहानको छाक टार्न नै मुस्किल हुने गरेको छ ।

जग्गा–जमिनमा उब्जनी गरेको खाद्यान्नले उनीहरूलाई छ महिना पनि खान पुग्दैन । गाउँपालिकाले दुई वडामा राखेको विशेषज्ञ स्वास्थ्य शिविरमा एक हजार दुई सय ४८ नागरिकले स्वास्थ्य सेवा लिएको भोटखोला गाउँपालिका अध्यक्ष वाङछेदर भोटेले जानकारी दिनुभयो । दुर्गम गाउँमै स्वास्थ्य सेवा र औषधि पाएपछि पैदल चारदेखि पाँच दिन लगाएर सदरमुकाम खाँदबारी जानुपर्ने बाध्यता हटेको भोटखोला–४ सिप्रुङका ७८ वर्षीय सिनेन लामाले बताउनुभयो । घर–आँगनमै निःशुल्क स्वास्थ्य सेवा पाउँदा खुसी लागेको स्थानीय लामाले बताउनुभयो ।

चीनको तिब्वतसँग सिमाना जोडिएको भोटखोला नागरिक उपचारका लागि सदरमुकाम आउन पैदल चारदेखि पाँच दिन लाग्ने गर्दछ । भौगोलिक रुपमा निकै विकटता भएको भोटखोलामा विषेशज्ञसहितको सेवा पाउनु निकै महत्वपूर्ण उपलब्धि भएको सङ्खुवासभाका प्रदेशसभा सदस्य राजेन्द्र कार्कीले बताउनुभयो । दुर्गम गाउँमा विषेशज्ञसहितको शिविर सबै स्थानीय तहले राख्नुपर्ने स्थानीयवासीको माग छ ।

भौगोलिक विकटता र विपन्नताका कारण औषधि उपचार नगर्नेले फाइदा पाउने प्रदेशसभा सदस्य कार्कीले बताउनुभयो । विपन्नको लागि स्वास्थ्य, नेपाल घुन्सा फाउण्डेशन काठमाडौँको सहयोग तथा भोटखोला गाउँपालिकाको आयोजनामा विभिन्न वडामा स्वास्थ्य शिविर सञ्चालन गरिएको अध्यक्ष भोटेले बताउनुभयो । काठमाडौँ वीर अस्पताललगायत अस्पतालमा कार्यरत विशेषज्ञ चिकित्सकको टोलीले स्वास्थ्य सेवा दिएको उहाँको भनाइ छ ।

विशेषज्ञ स्वास्थ्य शिविरमा भिडियो एक्सरे, यौन तथा प्रजनन् स्वास्थ्य, बाल रोग, नाक, कान, घाँटी, मुटु रोगसहितको सेवा दिइएको थियो । रासस