स्याङ्जा । नेपाली कांग्रेसको १५औँ महाधिवेशनमा स्याङ्जा क्षेत्र नं. २ का खुमा प्रसाद अर्यालले गण्डकी प्रदेश खुलातर्फको केन्द्रीय सदस्य पदमा उम्मेदवारी घोषणा गर्नुभएको छ।
वरिष्ठ चार्टर्ड एकाउन्टेन्ट अर्यालले नेपाल विद्यार्थी संघबाट राजनीतिक यात्रा सुरु गर्नुभएको थियो। उहाँले यसअघि पार्टीमा कार्यवाहक कोषाध्यक्ष र आर्थिक संयोजकजस्ता महत्त्वपूर्ण जिम्मेवारी निर्वाह गरिसक्नुभएको छ।
स्वास्थ्य क्षेत्रमा व्यवसायीका रूपमा सक्रिय अर्याल भैरहवा मेडिकल कलेज (यूसीएमएस), गण्डकी मेडिकल कलेज, पोखरा, नेपालगञ्ज मेडिकल कलेज, लर्ड बुद्ध मेडिकल कलेज र सञ्जीवनी मेडिकल कलेज, दाङलगायतका संस्थामा प्रमुख लगानीकर्ताका रूपमा संलग्न हुनुहुन्छ।
व्यवसायी अर्यालका अनुसार उहाँद्वारा सञ्चालित व्यवसाय तथा उद्योगहरूमा हालसम्म १५ हजारभन्दा बढी व्यक्तिले प्रत्यक्ष रोजगारी पाएका छन्। ‘खुमा अर्याल फाउन्डेसन’मार्फत स्याङ्जासहित देशका विभिन्न जिल्लामा शिक्षा, स्वास्थ्य तथा रोजगारीका क्षेत्रमा सामाजिक कार्यहरू हुँदै आउनु भएको छ ।
अर्याल यसअघि नेपाली कांग्रेसका तर्फबाट समानुपातिक संविधानसभा सदस्यका उम्मेदवारसमेत बन्नुभएको थियो।
