पोखरा। पोखरा स्थित मणिपाल शिक्षण अस्पतालको सेवामा अवरोध भएको छ । मणिपाल प्रशासनले तलब वृद्धि, बिदा कटौती, सुत्केरी बिदा र किरिया बिदासमेत कटौती गरेपछि कर्मचारीहरू आन्दोलित हुँदा अस्पतालको सेवामा अवरोध सिर्जना भएको हो ।
कर्मचारीहरूले आफ्नो सेवा सुविधा कटौती गरेपछि बिहान साढे ८ बजेदेखि मध्यान्ह १२ बजेसम्मको ओपिडी सेवा बन्द गरेका छन् । उक्त कक्ष बन्द हुँदा उपचारका लागि दिनहुँ पुग्ने सयौँ बिरामी मर्कामा परेका छन् ।कर्मचारीको अवरोधपछि टोकनका आधारमा बिरामीको अवस्था हेरेर मात्र अस्पतालले सेवा दिएको छ ।
स्वास्थ्य जस्तो संवेदनशील क्षेत्रमा हड्ताल गर्नु राम्रो नभएता पनि काजकिरिया बिदा माग्दासमेत अस्पताल प्रशासनले जागिर छोड्न भनेकाले आन्दोलन गर्न बाध्य भएको मणिपाल कर्मचारी युनियन अध्यक्ष अमृतबाबु पौडेलले बताउनुभयो । यसका साथै कर्मचारीहरूले शिक्षण अस्पतालका सबै शैक्षिक गतिविधि पनि रोकेका छन् ।
