चिकित्सा शिक्षाको स्नातक तहको भर्ना प्रक्रिया सुरु नगर्दा विद्यार्थी अन्योलमा

काठमाडौं । चिकित्सा शिक्षा आयोगले चिकित्सा शिक्षाको स्नातक तहको विभिन्न विषयको भर्ना प्रक्रिया सुरु नगर्दा विद्यार्थी अन्योलमा परेका छन् ।आयोगले हालसम्मपनि म्याचिङ प्रणालीको आवेदन नखुलाएको, शैक्षिक शुल्क र कलेजको सिट संख्या नतोक्दा विद्यार्थी अन्योलमा परेको बताउँछन् ।
आयोगले गएको चैत १८, २० र २१ गते चिकित्सा शिक्षाको स्नातक तहको एकीकृत प्रवेश परीक्षा सञ्चालन गरी चैत २३ र २६ गते नतिजा सार्वजनिक गरेको थियो । नतिजा सार्वजनिक भएको तेस्रो साता बित्दा पनि आयोगले म्याचिङ प्रणालीका लागि आवेदन खुलाएको छैन । यस्तै शैक्षिक शुल्क र कलेजको लागि सिट संख्या समेत तोकेको छैन ।

यतिबेलासम्म विद्यार्थीको सम्बन्धित मेडिकल कलेजमा भर्ना प्रक्रिया सुरु भइसक्नुपर्ने भए पनि विविध कारणले ढिलाइ भइरहेको आयोगले जनाएको छ । सिट निर्धारण सिफारिस समितिले गएको चैत १ गते नै आयोगलाई सिफारिस गरेको जनाएको छ । समितिको सिफारिस आयोगको कार्यकारी समितिले पारित गरेपछि लागू हुन्छ । सीटीइभीटीको कार्यक्रम र विश्वविद्यालयका कार्यक्रमहरु सञ्चालन गर्ने कलेजहरु नछुट्टिएको कारण सिट संख्या तोक्न समस्या भइरहेको आयोगको भनाई छ ।

आयोगले गत चैत ९ गते विश्वविद्यालय, प्रतिष्ठान, शिक्षण संस्थालाई पत्र पठाउँदै चिकित्सा शिक्षाको स्नातक तहमा विश्वविद्यालय र सीटीईभीटी दुवैको कार्यक्रम सञ्चालन गरेको भए यस वर्षदेखि एउटा छाड्न र एउटा मात्र कार्यक्रम सञ्चालन गर्न अनुरोध गरेको थियो ।
तर कलेजहरुले अझैसम्म सूचना नदिएका कारण सिट संख्या तोक्न समस्या भईरहेको आयोगका सदस्य सचिव डा भोजराज काफ्ले बताउँछन् । उनले भने ‘सीटीइभीटीको कार्यक्रम र विश्वविद्यालयका कार्यक्रमहरु डुप्लिकेसन भएका छन् । त्यो स्पष्ट नहुँदा सिट संख्या तोक्न समस्या भइरहेको छ ।’

चिकित्सा शिक्षा स्नातक तहको शैक्षिक शुल्क अझै तोकिएको छैन । सामान्यतया परीक्षाको नतिजा आउन अघि तोकिने शुल्क विद्यार्थी भर्ना गर्ने बेला भइसक्दा पनि आयोगले शुल्क तोक्न सकेको छैन । प्रधानमन्त्रीको अध्यक्षतामा बस्ने बैठकले शुल्क निर्धारण गर्नुपर्ने तर प्रधानमन्त्रीको व्यस्तताले बैठक बस्न नसकेको आयोगका सदस्य सचिव डा भोजराज काफ्लेको भनाई छ ।

अहिले स्थानीय तहको निर्वाचनको लागि प्रधानमन्त्री व्यस्त भएकोले चुनावपछि मात्रै हुनसक्ने काफ्लेले बताए । आयोगले चिकित्सा शिक्षामा स्नातकका विभिन्न विषयमा साढे आठ हजार सिटका लागि सञ्चालन गरेको परीक्षाका लागि करिब साढे ३५ हजार विद्यार्थीले आवेदन दिएका थिए ।