भुकम्पका घाईतेको सरकारले निशुल्क उपचार गर्छ : स्वास्थ्य मन्त्री बस्नेत

काठमाडौं । स्वास्थ्य तथा जनसंख्या मन्त्री मोहनबहादुर बस्नेतले गएराती जाजरकोट र रुकुममा भूकम्पमा परेर घाइते भएकाहरुको सरकारले निःशुल्क उपचार गर्ने बताएका छन् । शनिबार सञ्चारकर्मीहरुसँग कुराकानी गर्दै स्वास्थ्य मन्त्री बस्नेतले गए घाइतेहरुको उपचारका लागि स्वास्थ्यकर्मीहरुको टोली घटनास्थल पठाइसकिएको बताए । उनले आवश्यकता अनुसार थप उपचारका लागि औषधि सहित चिकित्सकको टोली तयारी अवस्थामा समेत राखिएको बताए ।

मन्त्री बस्नेतले भने, ‘त्यही उपचार गर्नु पर्ने घाइतेहरुको उपचार त्यही गर्छौ । त्यहाँ उपचार संभव नहुनेलाई हेलिकोप्टरबाट भए पनि सुविधासम्पन्न अस्पताल ल्याएर उपचार गर्छौ । उपचारमा कुनै कमी हुने छैन । ’ मन्त्री बस्नेतले आफू स्वास्थ्य मन्त्रीभएदेखि नै पैसाको अभावमा कुनै पनि नेपालीले ज्यान गुमाउनु पर्दैन भन्दै आइरहेकोले प्राकृतिक विपत्तिका बेला पनि सरकारले उपचारमा कुनै कमी नगर्ने प्रतिबद्धता व्यक्त गरे ।

मन्त्री बस्नेतले जाजरकोट र रुकुमको अवस्था हेरेर उपचारमा लागि थप सेवा सहयोगको बिषयमा मन्त्रालयका विज्ञहरुसँग सल्लाह गरेर अगाडि बढ्ने जानकारी दिए । जाजरकोट र पश्चिम रुकुममा गएराती आएको भूकम्पमा परेर अहिलेसम्म सय भन्दा बढीले ज्यान गुमाइसकेका छन् भने सयौं घाइते भएका छन् । प्रधानमन्त्री पुष्पकमल दाहाल तथा अन्य दलका सांसद प्रतिनिधि पनि जाजरकोट पुगिसकेका छन् ।