काठमाडौँ । स्वास्थ्य तथा जनसङ्ख्या मन्त्री प्रदीप पौडेलले स्वास्थ्य संरचनालाई निरोधात्मक पक्षमा ध्यान दिँदै चेतनाको अभिवृद्धिमा काम गर्न आवश्यक रहेको बताउनुभएको छ ।
राष्ट्रिय जनस्वास्थ्य दिवसका अवसरमा नेपाल जनस्वाथ्य सङ्घ (नेफा)ले आज काठमाडौंमा आयोजना गरेको कार्यक्रममा बोल्दै उहाँले यस्तो कुरा बताउनु भएको हो ।
“बिरामी हुँदा उपचार गर्ने राज्यको दायित्व हो । तर विरामीको सङ्ख्या बढ्दै जाँदा सबैको निःशुल्क उपचार गर्न नसकिने अवस्था पनि हुनसक्छ ”, उहाँले भन्नुभयो, “सबैलाई कसरी निरोगी बनाउने र कम खर्चमा कसरी सेवा गर्न सकिन्छ त भन्ने मुख्य कुरा हो ।” उहाँले जनस्वास्थ्य क्षेत्रको उपस्थितिले यी लक्ष्य हासिल गर्न सहज हुने विश्वास समेत व्यक्त गर्नुभयको थियो ।
नेफाका उपाध्यक्ष तेजप्रसाद दुलालले जनस्वास्थ्य विषयका महत्व तथा यस क्षेत्रका सवाललाई उजागर गरेर राज्यका विभिन्न तहमा साथै सरोकारवालालाई यसको प्राथमिकताको बारेमा सचेतना गर्ने उद्देश्यले दिवस मनाउने गरेको बताउनुभयो ।
नेपाल जनस्वास्थ्य सङ्घ ( नेफा ) वि.स.२०४७ साल मङ्सिर २३ गते स्थापना भएको हो । नेफाले‘जनस्वास्थ्य आवश्यक लगानी गरौँ, स्वस्थ्य राष्ट्र निर्माण गरौँ’ भन्ने मूल उद्देश्यका साथ सप्ताहव्यापी रुपमा सातै प्रदेशमा दिवसको अवसरमा कार्यक्रम सञ्चालन गरेको छ ।
