काठमाडौं । युरोप नेपाल हेल्थ अवार्ड २०२५ काठमाडौंमा सम्पन्न भएको छ। काठमाडौंमा आयोजित एक समारोहबीच नेपाल चिकित्सक संघलाई युरोप नेपाल हेल्थ अवार्ड २०२५ प्रदान गरिएको हो।
नेपाल चिकित्सक संघले बर्ष २०२५ मा आवासीय चिकित्सकहरूको हकअधिकार तथा पेशागत सुरक्षाका लागि पुर्याएको उल्लेखनीय योगदानको कदरस्वरूप ताम्रपत्रसहित नगद नेपाली एक लाख एक रुपैयाँ पुरस्कार राशीसहित संघलाई सम्मान गरिएको संस्थाका अध्यक्ष तथा वरिष्ठ क्यान्सर रोग विशेषज्ञ डा. विनय कुमार श्रेष्ठले जानकारी दिनुभयो।
कार्यक्रममा प्रा.डा. अञ्जनी कुमार झा, डा. अनिल विक्रम कार्की, डा. प्रमोद जोशी, डा. लोचन कार्की, डा. आनन्द प्रसाद श्रेष्ठ, डा. चोपलाल भुसाल, डा. रमेश कान्त अधिकारी, डा. बुद्धिमान श्रेष्ठ, डा. अनिल भट्टराईलगायतको उपस्थिति रहेको थियो।
संस्थाका खोजअनुसन्धान तथा विज्ञान विभागका निर्देशक डा. कौशल किशोर तिवारीले संस्थाको उद्देश्य र भावी योजनाबारे जानकारी दिँदै यस्ता अवार्ड कार्यक्रमलाई प्रत्येक वर्ष थप परिस्कृत र व्यवस्थित बनाउँदै लैजाने बताउनुभयो।
सोसाइटी अफ नेप्लिज हेल्थकेयर प्रोफेसनल्स इन युरोपले नेपालका स्वास्थ्य तथा शिक्षाको क्षेत्रमा निरन्तर सहयोग गर्दै आइरहेको छ।
