जाकार्ता (रासस÷सिन्ह्वा) ः इन्डोनेसियामा शुक्रबारदेखि कोरोना भाइरसविरुद्ध चौथो मात्रा खोप लगाउन सुरु गरिएको छ । पहिलो चरणमा स्वास्थ्यकर्मीहरुलाई चौथो मात्राको खोप लगाउन थालिएको सरकारी अधिकारीहरुले जानकारी दिएका छन् ।
स्वास्थ्यकर्मीहरुलाई लगाएपछि अरुलाई लगाउने गरी तयारी भइरहेको पनि उनीहरुले बताएका छन् । स्वास्थ्य मन्त्रालयले बिहीबार जारी गरेको वक्तव्यमा सुरुमा १९ लाख स्वास्थ्यकर्मीहरुलाई खोप लगाइने उल्लेख गरिएको छ ।
पछिल्लो समय इन्डोनेसियाका कोरोना भाइरसबाट दैनिक सङ्क्रमितहरुको सङ्ख्या बढ्दै गएकाले चौथो मात्राको खोप लगाउनु परेको मन्त्रालयको भनाई छ ।
सङ्क्रमितहरु बढेपछि स्वास्थ्यकर्मीहरु उच्च जोखिममा रहेकोले सुरुमा उनीहरुलाई खोप लगाइने भएको अधिकारीहरुले जनाएका छन् ।
बिहीबार सार्वजनिक गरिएको विवरणअनुसार पछिल्लो एक दिनमा इन्डोनेसियामा छ हजार ३५३ जना कोरोना भाइरसबाट नयाँ सङ्क्रमित भएका छन् भने अरु १७ जनाको मृत्यु भएको छ ।
