आन्दोलनरत आवासीय चिकित्सकलाई कलेज छाड्न अल्टिमेटम

पर्सा । नेसनल मेडिकल कलेज तथा शिक्षण अस्पतालले आन्दोलनरत स्नातकोत्तर तहका आवासीय चिकित्सकलाई कलेज छाड्न अल्टिमेटम दिएको छ।

बिहीबार कलेजले सूचना प्रकाशित गरेर स्नातकोत्तर प्रथम वर्षका आवासीय चिकित्सकलाई १२ घण्टाभित्र छात्रावासका कोठा तथा क्वार्टर वा अन्य आवासीय सुविधा खाली गर्न भनेको छ। आवासीय चिकित्सकहरू एक सातादेखि आन्दोलनमा उत्रिएपछि कलेजका प्राचार्य र होस्टल सुपरिटेन्डेन्टले सूचना जारी गरी कलेज खाली गर्न निर्देशन दिएका हुन्।

यससँगै कलेजले चिकित्साशास्त्र अध्ययन संस्थान (आईओएम) लाई शैक्षिक सत्र २०८२ का स्नातकोत्तर प्रथम वर्षका आवासीय चिकित्सकलाई फिर्ता बोलाउन पनि आग्रह गरेको छ। आईओएमलाई औपचारिक पत्र पढाइसकेको पनि सूचनामा उल्लेख छ।

‘सम्पूर्ण प्रथम वर्षका स्नातकोत्तर आवासीय चिकित्सकहरूलाई यो सूचना जारी भएको समयदेखि १२ घण्टाभित्र कलेजबाट उपलब्ध गराइएको सम्बन्धित आवासीय चिकित्सकहरूले तोकिएको अवधिभित्र आवश्यक हस्तान्तरण प्रक्रिया पूरा गरी आवासीय परिसरबाट आफ्ना व्यक्तिगत सामानसमेत हटाउनुपर्नेछ,’ कलेजले सूचनामा भनेको छ।

यससँगै कलेलले स्नातकोत्तर तह प्रथम वर्षको अध्ययन अध्यापन पनि बन्द गरेको छ। सूचनामा भनिएको छ, ‘तत्काल प्रभावबाट अर्को सूचना जारी नभएसम्म सम्पूर्ण प्रथम वर्षका स्नातकोत्तर आवासीय चिकित्सकहरूको कक्षा, शैक्षिक गतिविधि, क्लिनिकल पोस्टिङ, विभागीय प्रशिक्षण, वार्ड/इमर्जेन्सी ड्युटी तथा अन्य सबै प्रशक्षिण गतिविधिहरू स्थगित रहनेछन्।’