जनकपुर । जनकपुर प्रादेशिक अस्पतालमा चिकित्सकमाथि कुटपिट भएको घटनाप्रति नेपाल चिकित्सक संघले भर्त्सना गरेको छ। संघले चिकित्सक तथा स्वास्थ्यकर्मीको सुरक्षा सुनिश्चित गर्दै घटनामा संलग्नमाथि कारबाही गर्न माग गरेको छ।
प्रसूति सेवा लिन आएकी महिलाका आफन्तले चिकित्सकमाथि कुटपिट गरेको अस्पतालले जनाएको छ। अस्पतालका अनुसार जटिल अवस्थाका कारण बिरामीको शल्यक्रियामार्फत प्रसूति गराउनुपर्ने देखिएको थियो।
अस्पतालका सूचना अधिकारी डा. रामज्ञान यादवका अनुसार शल्यक्रियाअघि उपचारका सम्भावित जोखिमबारे आफन्तलाई जानकारी गराई स्वीकृतिमा हस्ताक्षर गर्न आग्रह गर्दा विवाद भएको थियो। सोही क्रममा डा. साहमाथि कुटपिट भएको उनले बताए।
अस्पताल प्रशासनले कार्यस्थलमा स्वास्थ्यकर्मीमाथि हुने कुटपिटले उपचार सेवा प्रभावित हुनुका साथै स्वास्थ्यकर्मीको मनोबलमा समेत असर पर्ने जनाएको छ।
