जुम्ला ।जिल्ला स्वास्थ्य कार्यालय जुम्लाले तिला गाउँपालिका–५ डुङ्ग्रीमै पुगेर महिलालाई स्वास्थ्य सेवा प्रदान गरेको छ । कार्यालयले त्यहाँका ७३ महिलाको पाठेघरको जाँच गरेको छ ।
मङ्गलबार ४६ परिवार भएको डुङ्ग्रीमै पुगेर स्वास्थ्य कार्यालयले स्क्रिनिङ शिविर सञ्चालन गरेको हो । कर्णाली राजमार्गबाट करिब तीन घण्टाको उकालो काटेर पुगिने उक्त गाउँका महिलाको स्वास्थ्य जाँच गरिएको कार्यालयका सुरक्षित मातृत्व तथा परिवार नियोजन कार्यक्रम संयोजक मोर्चा शाहीले जानकारी दिनुभयो ।
“स्वास्थ्यचौकी कुडारीमा हुँदा सामान्य परीक्षण गर्न महिलालाई सहज छैन । दिनभर समय लाग्छ”, उहाँले भन्नुभयो, “पाठेघरका समस्या भएका महिला हिँड्न कठिन भएकाले उपचार गर्न नसकेको अवस्था थियो ।” उक्त गाउँका बासिन्दाले स्वास्थ्य शिविरको माग गर्दैआएका थिए । शाहीका अनुसार कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका मेडिकल अधिकृत डा तिब्विनकुमार सिवाकोटीको सहयोगमा कार्यालयका स्वास्थ्यकर्मीसहितको टोली त्यहाँ पुगेको थियो ।
प्रतिष्ठानका डा सिवाकोटीले पाठेघरको मुखको क्यान्सर र अब्सटेट्रिक फिष्टुलाको स्क्रिनिङ गरिएको बताउनुभयो । आङ खस्ने, पिसाब चुहिने, पेट, ढाड दुख्ने, रगत बग्नेलगायत समस्या देखिएको डा सिवाकोटीले बताउनुभयो । मातृशिशु संयोजक शाहीका अनुसार शिविरमा ६ जनाको पाठेघरमा रिङ राखिएको छ भने २३ जनालाई आवश्यक औषधि र परामर्श प्रदान गरिएको थियो ।
