पित्त थैलीको शल्यक्रिया गर्दा बिरामीको ज्यान नै जोखिममा परेको घटना सार्वजनिक भएपछि छानविन गर्न सभामुखको रुलिङ

जनकपुरधाम । प्रादेशिक अस्पताल जनकपुरमा चिकित्सकको गम्भीर लापरबाही घटनाको विषयमा प्रदेश सभाको बैठकमा आवाज उठेपछि छानबिनका लागि मधेश प्रदेश सभाका सभामुखले रुलिङ गर्नु भएको छ ।

अस्पतालका चिकित्सकले बिरामीको चेकजाँच बिनै पित्त थैलीको शल्यक्रिया गर्दा बिरामीको ज्यान नै जोखिममा परेको घटना सार्वजनिक भएपछि यसलाई गम्भीर रूपले लिँदै सभामुख सरोज कुमार यादवले छानविन गर्नका लागि रुलिङ गर्नु भएको छ ।

मधेश प्रदेशसभाको बैठकमा विशेष समय लिएर प्रदेशसभा सदस्यहरु लोसपाका प्रदेश सभा सदस्यहरु उपेन्द्र महतो, रानीशर्मा तिवारी र जसपाका मनिष सुमनले आवाज उठाएपछि सभामुखले छानविन गर्न रुलिङ गर्नु भएको छ ।

सभामुख सरोजकुमार यादवले महिला बालबालिका तथा सामाजिक न्याय समितिलाई छानविन गरी १५ दिनभित्र प्रतिवेदन बुझाउन निर्देशन दिनु भएको छ । समितिका सभापति जयनूल राईनले आज समितिको बैठक डाक्नु भएको छ । बैठकबाट घटनाको छानबिनको विषयमा आवश्यक निर्णय लिनु हुनेछ ।

छानबिनमा खटिएर बिरामीको अवस्था बुझ्नेदेखि लिएर चिकित्सकको लापरबाहीको विषयमा गहन रुपमा छानविन गरी १५ दि भित्र प्रतिवेदन बुझाउने तयारी थालेको उहाँले जानकारी दिनु भयो ।

बिरामीले झण्डै चार महिना अघि गराएको चेकजाँचको आधारमा चिकित्सकले पित्त थैली पत्थरीको शल्यक्रिया गर्दा महोत्तरीको जलेश्वर नगरपालिका २ घर भई हाल जनकपुरधाम उप–महानगरपालिका कोठा भाडा लिएर बस्दै आएकी विभा चौधरीको अवस्था गम्भीर बनेको छ ।

उनको उपचार अहिले काठमाडौँस्थित मेडिसिटी हस्पिटलमा भइरहेको छ । गत असार १३ गते प्रादेशिक अस्पतालमा बिना चेकजाँच नै अप्रेसन गरेपछि उनको अवस्था गम्भीर बनेको थियो । त्यसपछि असार १६ गते उनलाई थप उपचारको लागि हेलिकप्टरबाट काठमाडौँ लगिएको थियो । २८ फागुन २०७८ मा नै बिरामीले अल्ट्रासाउण्डमा गराएको रिपोर्टको आधारमा नै डा. अमरेश कर्णले भर्ना गरी डा. राजेश साह र डा. आश्विनी यादवले शल्यक्रिया गरेका थिए ।

उता पीडित परिवारले उपचारमा लापरबाही गर्ने संलग्न चिकित्सकहरूलाई कडा कारबाहीको साथै क्षतिपूर्तिको माग गरेका छन् ।