तनहुँ । स्पाउज क्लब अफ आर.सी. चितवन र रोटरी क्लब अफ चितवनको आयोजनामा भानु माध्यमिक विद्यालय, बन्दीपुर, तनहुँमा किशोरीहरूका लागि “स्वास्थ्य, शरीर र विज्ञान: बुझौँ, स्वीकारौँ र गर्व गरौँ” शीर्षकमा स्वास्थ्य सचेतना कार्यक्रम सफलतापूर्वक सम्पन्न भएको छ । कक्षा ७ देखि १२ सम्मका ११० जना छात्राहरूको सहभागिता रहेको उक्त कार्यक्रममा महिनावारी, शारीरिक परिवर्तन र सरसफाइबारे विस्तृत जानकारी दिइएको थियो ।
कार्यक्रमको मुख्य स्रोत व्यक्तिका रूपमा स्टाफ नर्स तथा स्पाउज क्लब अफ आर.सी. चितवनकी अध्यक्ष जानकी तिवारी शर्मा रहनुभएको थियो । उहाँले डिजिटल प्रस्तुतिमार्फत स्त्री प्रजनन प्रणाली, महिनावारी चक्र, किशोरावस्थामा आउने शारीरिक तथा भावनात्मक परिवर्तनहरू र महिनावारीसम्बन्धी समाजमा व्याप्त अन्धविश्वास तथा भ्रमहरू प्रस्तुत गर्नुभयो । उहाँले सन्तुलित पोषण, सफा प्याडको प्रयोग र विश्व स्वास्थ्य संगठन तथा नेपाल सरकारका स्वास्थ्य मापदण्डहरूबारे प्रकाश पार्नुभयो ।
कार्यक्रममा स्पाउज क्लबका सदस्यहरू कविता चुके, मना पिया, रोशनी प्रधान र जलश्री श्रेष्ठको उपस्थिति रहेको थियो । त्यसैगरी रोटरी क्लब अफ चितवनका अध्यक्ष गजेन्द्र श्रेष्ठ, पास्ट प्रेसिडेन्ट काउन्सिल चियर भानु शर्मा, पूर्वअध्यक्षहरू उत्तमलाल चुके, दिलीप पिया, दीपक प्रधान, प्रेसिडेन्ट इलेक्ट राजन पिया, उपाध्यक्षहरू गोपाल भट्टराई र गुनेश्वर महतो तथा सचिव रोशन खरेललगायत पदाधिकारीहरूको विशेष उपस्थिति थियो ।
कार्यक्रमको अन्तिम चरणमा खुला प्रश्नोत्तर सत्र सञ्चालन गरिएको थियो, जहाँ विद्यार्थीहरूले निर्धक्क भएर प्रश्नहरू सोधेका थिए । किशोरीहरूले सचेतना सत्र एकदमै उपयोगी रहेको भन्दै खुसी व्यक्त गरेका थिए ।
