चितवन । चितवन जिल्लामा गत नौ महिनामा ८० जना एचआइभी एड्स सङ्क्रमित थपिएका छन् । भरतपुर अस्पतालमा रहेको एड्स हेल्थ फाउन्डेसनले सन् २०२६ को जनवरीदेखि हालसम्म २२३ जनामा गरेको परीक्षणका क्रममा ८० जनामा रोगको सङ्क्रमण देखिएको हो ।
यस अवधिमा नयाँ भेटिएका सङ्क्रमितसहित ९१ जना नयाँ बिरामीले एड्सविद्धको औषधि सेवन गर्न थालेका छन् । ११ जना जिल्ला बाहिरबाट आएका हुन् । योसँगै अहिले फाउन्डेसनबाट एआरटी औषधि सेवन गर्ने एक हजार २९३ जना बिरामी पुगेका छन् । अस्पतालका फिजिसियन डा प्रमोद पौडेलका अनुसार सङ्क्रमितहरूमा गरिएको यौन रोग परीक्षणका क्रममा ५२ जनामा यौन रोगको समेत सङ्क्रमण देखिएको छ । एक हजार १६१ जनाको परीक्षणका क्रममा उनीहरूमा यौन रोग देखिएको हो । सङ्क्रमण देखिएकाहरूको उपचार गरिएको उहाँले जानकारी दिनुभयो ।
उहाँले भन्नुभयो, “पछिल्लो समय सरकारी तवरबाट कण्डम उपलव्ध हुन नसक्दा बिनासावधानी यौन सम्पर्क गर्ने ती समूहमा यौन रोग तथा भिरिङ्गी देखिएको हो ।” एड्स सङ्क्रमितहरूमा क्षयरोगको समस्या पनि देखिने गरेको उहाँले बताउनुभयो । एक सय ४८ जनाको खकार परीक्षणका क्रममा १५ जनामा क्षयरोग देखिएको उहाँले बताउनुभयो । जनवरीदेखि हालसम्म नियमित औषधि खाइरहेकामध्ये तीन जनाले औषधि सेवन गर्न छाडेको र सम्पर्कमा नआएको फाउन्डेसनले जनाएको छ ।
